राम निरौला,
कनकाई खबर \ पुर्वकै प्रसिद्ध पर्यटकीय स्थल झापाको कनकाईस्थित जामुनखाडी सिमसार क्षेत्रमा संचालन भएको प्रथम हर्क राई स्मृति नकआउट फुटबल प्रतियोगिताको उद्घाटन खेलमा उर्लाबारी फुटबल क्लव विजयी बनेको छ ।
उर्लाबारीले ३–२ को गोल अन्तरले आयोजक जामुनखाडी स्पोर्टिङ क्लवलाई पछि पार्दै विजयी बनेको हो । प्रतियोगिताको झापा क्षेत्र नं.४ का नवनिर्वाचित संघीय सांसद एल.पी.साँवालिम्बूले उद्घान गरेका हुन् । संघीय सांसद साँवाले जामुनखाडी प्राकृतिक रङ्गशाला सहित फुटबल प्रतियोगिताको एकै साथ उद्घाटन गरे । कार्यक्रमको प्रमुख अतिथीका रुपमा रहेका साँवाले जामुनखाडी फुटबल स्तम्भको समेत अनावरण गरे ।
स्थानीय सामाजिक व्यक्तित्व एवं फुटबल खेलाडी हर्क राईको २०७९ श्रावण २६ गते४१ बर्षको युवा अवस्थामै मृत्यु भएको थियो । उनकै स्मृत्तिमा जामुनखाडी स्पोर्टिङ् क्लव एवं जामुनबारी सामुदायिक वन समूहको संयुक्त आयोजनामा फुटबल प्रतियोगिता संचालन गरिएको वन समूहका अध्यक्ष ख्यामराज सिटौलाले बताए । खेलकुदको माध्यमबाट पर्यटन प्रवद्र्धनमा थप टेवा पुग्ने विश्वासका साथ जामुनखाडी सिमसार तथा पर्यटकीय क्षेत्रमा खेल मैदानको व्यवस्थापन गरिएको कार्यक्रमको अध्यक्षता गरिरहेका वन समूहका अध्यक्ष सिटौलाले जानकारी दिए । प्रतियोगितालाई आगामी बर्षमा समेत निरन्तरता दिँदै जाने जनाइएको छ ।
जामुनखाडी सिमसार क्षेत्रको चारैतिर वनजङ्गलले ढाकिएको प्राकृतिक रंगशालालाई प्रदेश नं.१ मै उत्कृष्ट बनाउँने कार्यमा सरकारका तीनवटै तहको सहयोग रहनुपर्नेमा स्थानीय वडा नं.२का वडाअध्यक्ष बलराम राईले जोड दिए । वडाअध्यक्ष राईले एक पालिका एक रङ्गशाला निर्माणको अवधारणा अनुसार खेल मैदानको थप व्यवस्थापनकालागि तयार पारिएको डिपीआर संघीय सांसद एल.पी.साँवालाई हस्तान्तरण गरे ।
आयोजक टिम सहित प्रदेश नम्बर१ का ८वटा टिमको सहभागीता रहने प्रतियोगिताको उद्घाटन खेल आयोजक जामुनखाडी स्पोर्टिङ क्लव र उर्लाबारी फुटबल क्लव विच भएको थियो । उर्लावारीकालागि सञ्जय धिमालले खेलको ९ मिनटमा आफ्नो टिमकालागि सुरुवाती गोल गरेका थिए । त्यसपछि खेलको ६२ मिनटमा पासाङ तामाङ्ले अर्को गोल र ७२ मिनटमा सञ्जयबाटै तेस्रो गोल भएपछि उर्लावारीले आफ्नो जीत सुनिश्चित गरेको हो । आयोजकका तर्फबाट खेलको ८औं मिनटमा रोशन बर्देवाले सुरुवाती गोल गरेका थिए । त्यसपछि २० मिनमा रोशनले नै दोस्रो गोल गर्दै पहिलो हापमा टिमलाई अग्रता दिलाएका थिए । तर हापपछिको दोस्रो खेलमा उर्लाबारीले थप दुई गोल गरेर टिमलाई विजेता घोषित गर्यो ।
आइतवार पथरी फुटबल क्लव र शनिश्चरे फुटबल क्लव विच खेल हुने आयोजक समितिले जनाएको छ । कनकाई नगरपालिकाका प्रमुख राजेन्द्रकुमार पोखरेलसहित विभिन्न वडाका जनप्रतिनिधि, विभिन्न संघसंस्थाका प्रमुख तथा प्रतिनिधिहरुको सहभागीता रहेको समुद्घाटन समारोहमा जामुनवारी सामुदायिक वन समूह एवं कनकाई वडा नं.–२,का पुर्व अध्यक्ष पर्शुराम गिरीले प्रतियोगिताको पूर्ण सफलताको शुभकामना दिए । समुद्घाटन समारोहको संचालन आयोजक समितिका सदस्य विनोद रानामगरले गरेका थिए । प्रतियोगितामा खेलाडीहरुको सहयोगार्थ समर मेडिसिन सेन्टर सुरुङ्गाले प्राथमिक स्वास्थ्य सेवाको संयोजन गरेको थियो ।
खेलमा प्रथम हुने टिमले नगद १ लाख ११ हजार र दोस्रो हुने टिमले नगद ५५ हजार रुपैँया साथै ट्रफी , मेडल र प्रमाण पत्र प्राप्त गर्ने आयोजक समितिका प्रचार प्रसार संयोजक संचारकर्मी मोहन नेम्बाङ्ले जानकारी दिए ।
प्रतियोगितामा आयोजकसहित उर्लावारी फुटबल क्लव, एपिएफ पकली, रोलिङ्ग क्लव धुलावारी, जलथल फुटबल क्लव, बेलवारी फुटबल क्लव, पथरी फुटबल क्लव र शनिश्चरे फुटबल क्लवले सहभागिता जनाउँने छन् । प्रतियोगिता सम्पन्न गर्न विश्व विजय खरेलको संयोजनमा आर्थिक समिति , मोहन नेम्बाङ्को संयोजनमा प्रचारप्रसार समिति,गोपाल बस्नेतको संयोजनमा मैदान ब्यवस्थापन समिति , दिनेश राईको संयोजनमा टिम ब्यवस्थापन समिति लगायतका विभिन्न उप समितिहरु समेत निर्माण गरिएको आयोजक समितिका संयोजक गणेश गिरीले जानकारी दिए ।
