पूर्वको धार्मिक पर्यटनलाई विश्वसामु पु¥याउने लक्ष्य : राधिका दासी
कनकाई खबर / झापाको कनकाई–६, मनसापुरमा यहि मंसिर १२ देखि २१ गतेसम्म श्रीमद्भागवत नवाह धनधान्याचल ज्ञान महायज्ञ आयोजना हुने भएको छ ।
असहाय बालबालिकाको शिक्षा, संरक्षण र संस्थाको निर्माणाधीन भवनलाई पूर्णता दिने उद्देश्यले आयोजना गर्न लागिएको महायज्ञको तयारी र कार्यतालिका सार्वजनिक गरिएको छ ।
राधिका फाउन्डेसनकी अध्यक्ष भागवत मञ्जरी पूज्या राधिका दासीज्यूको अध्यक्षतामा निर्माणाधीन भवनस्थलमा आयोजित पत्रकार सम्मेलनमार्फत महायज्ञको तयारी र कार्यतालिका सार्वजनिक गरिएको हो ।
पत्रकार सम्मेलनमा बोल्दै अध्यक्ष राधिका दासीज्यूले पूर्वको धार्मिक पर्यटनलाई विश्वसामु चिनाउने र धार्मिक अनुष्ठानबाट संकलित सहयोगलाई असहाय बालबालिकाको उज्ज्वल भविष्य निर्माणमा जोड्ने मुख्य लक्ष्य रहेको बताएकी छन् । महायज्ञमा देशका ४७ वटा जिल्लाबाट भक्तजनहरू सहभागी हुने निश्चित भइसकेको छ भने विदेशबाट समेत श्रद्धालुहरूको उपस्थिति रहने जनाइएको छ ।
महायज्ञलाई भव्य र व्यवस्थित रूपमा सम्पन्न गर्न स्थानीय सरकारको समेत प्रतिनिधित्व रहने गरी कनकाई वडा नं. ६ का वडाअध्यक्ष लक्ष्मीप्रसाद ओलीलाई कार्यक्रम संयोजक तोकिएको छ । पत्रकार सम्मेलनमा संयोजक ओलीले महायज्ञको औचित्य र व्यवस्थापकीय तयारीबारे प्रकाश पारेका थिए ।
महायज्ञमा स्वदेश तथा विदेशका धार्मिक गुरु, सन्तमहन्त, गायक–गायिका र कलाकारको सहभागिता रहने बताइएको छ । महायज्ञ सम्पन्न गर्न करिब २५ लाख रुपैयाँ खर्च हुने अनुमान गरिएको छ। आयोजकले करिब दुई करोड रुपैयाँ सहयोग संकलन गर्ने लक्ष्य राखेको छ।
काठमाडौँको कपन र झापाको मनसापुरमा कार्यालय रहेको राधिका फाउन्डेसनले हाल ३७ जना असहाय बालबालिकालाई संरक्षण दिइरहेको छ । जसमध्ये मनसापुरस्थित आश्रममा रहेका १७ जना बालबालिका कनकाई–३, सुरुङ्गास्थित पशुपति अंग्रेजी माविमा अध्ययनरत छन् । मनसापुरमा करिब साढे ५ करोड रुपैयाँको लागतमा निर्माणाधीन फाउन्डेसनको आफ्नै भवनलाई पूर्णता दिन महायज्ञबाट संकलित रकम खर्च गरिनेछ । यसका साथै फाउन्डेसनले झापाको बाह्रदशी गाउँपालिका–७ मा गुरुकुलीय पाठशाला, गौशाला, यज्ञशाला, धर्मशाला र औषधालय सहितको एकीकृत बृहत् परियोजनाको गुरुयोजना तयार पारी निर्माण कार्य समेत अघि बढाएको छ ।
सार्वजनिक कार्यतालिका अनुसार मंसिर १२ गते भव्य कलश शोभायात्रा निकालिनेछ भने मंसिर १३ देखि २१ गतेसम्म ९ दिन पूज्या राधिका दासीज्यूको मुखारविन्दबाट संगीतमय श्रीमद्भागवत कथा प्रवचन तथा प्रत्येक साँझ भव्य गङ्गा आरती सञ्चालन हुनेछ ।
सञ्चारकर्मी केशव भट्टराईले सहजीकरण गरेको पत्रकार सम्मेलनमा कार्यक्रम संयोजकका रुपमा रहेका कनकाई ६ का वडाअध्यक्ष लक्ष्मीप्रसाद ओली, नेपाल पत्रकार महासंघ झापाका अध्यक्ष एकराज गिरी, जग्गादाता तथा स्थानीय सामाजिक व्यक्तित्व शान्तीराम प्रसाईं लगायतको विशेष आतिथ्य रहेको थियो । फाउन्डेसन परिवारले यस मानवीय र धार्मिक महाअभियानमा तन, मन र धनले सहयोग गर्न सम्पूर्ण धर्मप्रेमी, उद्योगी, व्यवसायी, समाजसेवी तथा आम नागरिकमा हार्दिक अपिल गरेको छ ।

