कनकाई खबर /झापाको शिवसताक्षी १० स्थित के.एन.के. स्पोट्स क्लबले ‘आजको सानो प्रयास, भोलिको उत्कृष्ट खेलाडी निर्माणको आधार’ भन्ने मूल नाराका साथ दश वर्ष मुनीका खेलाडी उत्पादन गर्ने उद्येश्यले “अन्डर टेन ग्रासरुट फुटबल प्रशिक्षण” संचालन गरेको छ ।
बालबालिकाकोलागि संचालन गरिएको यस किसिमको प्रशिक्षणबाट रैथाने बालबालिका र अभिभावकहरूमा अभूतपूर्व उत्साह जागेको बताइएको छ । बालबालिका देशको भविष्य भएकाले उनीहरूमा सानै उमेरदेखि खेलकुद संस्कार, आत्मविश्वास, अनुशासन, सहकार्य र नेतृत्व क्षमताको विकास गराउनु आजको आवश्यकता हो भन्ने सोचलाई आत्मसात् गर्दै क्लबले यस कार्यक्रमलाई प्रारम्भिक चरणबाटै पाएलट परियोजनाका रुपमा अगाडि बढाएको बताइएको छ ।
यस विशेष प्रशिक्षणमार्फत सहभागी ४० जना बालबालिकाहरूलाई फुटबल खेलका आधारभूत तथा व्यावहारिक सीपहरू,जस्तै बल कन्ट्रोल, ड्रिब्लीङ, पासिङ,सुटिङ, कर्डिनेशन, टिम वर्क र खेल सम्बन्धि सचेतनाका विषयमा उच्चस्तरीय ज्ञान प्रदान गरिने आयोजकले जनाएको छ ।
झापा ११ एफसीका चर्चित विङ्गर मनिष योङहाङ र गोलकिपर सन्दीप लिम्बू जस्ता अनुभवी खेलाडीहरूबाट ४० जना बालबालिकाहरूले यहि कातिक १० गतेदेखी हरेक बिहान ५ः३० देखी ७ः३० बजेसम्म के.एन.के. स्पोर्टस् क्लवको खेल मैदानमा उत्साहका साथ फुटबलका आधारभूत सीपको प्रशिक्षण पाइरहेको बताइएको छ ।
हरेक बालबालिकाभित्र कुनै न कुनै प्रतिभा लुकेको हुन्छ र त्यस प्रतिभालाई सही अवसर, उचित प्रशिक्षण र सकारात्मक वातावरण प्रदान गर्नु सबैको साझा जिम्मेवारी हो भन्ने कुरालाई आयोजकले जोड दिएको छ। बालबालिकालाई मोबाइल र डिजिटल माध्यममा मात्र सीमित नराखी खेलमैदानसम्म ल्याएर स्वस्थ, सक्रिय, आत्मविश्वासी र अनुशासित बनाउने यस अभियानमा सम्पूर्ण नगरवासीलाई हातेमालो गर्न समेत अपिल गरिएको छ ।
यसैक्रममा कार्यक्रमका मुख्य आर्थिक सहयोगी संस्था योङहाङ युवा समितिका सल्लाहकार एवं शिवसताक्षी नगरपालिकाका लेखा अधिकृत प्रकाश योङहाङले प्रशिक्षणको स्थलगत अवलोकन गर्दै बालबालिकाहरूको ऊर्जा र लगावले नेपाली फुटबलको भविष्य उज्यालो रहेको बताएका छन् । सल्लाहकार योङहाङले भने, ‘अहिलेको डिजिटल युगमा बालबालिकालाई मोबाइल स्क्रिनबाट टाढा राखेर खेलमैदानमा यसरी दौडिरहेको देख्नु आफैँमा गौरवको कुरा हो। यी साना नानीहरूको जोस र आयोजकको यो ऐतिहासिक कदमलाई अझ उचाइमा पु¥याउन आगामी दिनमा हामी थप ठूलो र सशक्त सहयोग गर्न प्रतिबद्ध छौँ । ‘
त्यस्तै, समितिका अर्का सल्लाहकार मोहन योङहाङले पनि स्थानीय स्तरबाटै खेलकुद संस्कारको विकास गर्ने के.एन.के. स्पोट्स क्लबको यो प्रयास सह्रानीय रहेको उल्लेख गर्दै यस पायलट प्रोजेक्टले वडा नं. १० को आधिकारिक अन्डर–१० टोलीका लागि उत्कृष्ट १५ खेलाडी मात्र जन्माउने नभई राष्ट्रकै लागि दक्ष खेलाडी उत्पादन गर्ने जग बसाल्ने विश्वास व्यक्त गरे ।
स्थानीय सामाजिक संस्था योङहाङ युवा समितिले रु. १० हजार र स्थानीय मुसाफिर फुटबल समूहले रु.७ हजारको नगद सहयोगमा संचालित यस निःशुल्क प्रशिक्षणमा नाम दर्ताका लागि आयोजक समितिका निरकुमार बस्नेत र दिलिप नेम्बाङले बाँकी अभिभावकहरूलाई समेत तुरुन्त सम्पर्क गर्न आह्वान गरेका छन्।
यसैबीच, स्थानीय समाजसेवी तथा आयोजक समितिका उपाध्यक्ष पदम कुँवरले कार्यक्रमलाई थप व्यवस्थित र अनुशासित बनाउन अभिभावकहरूको भूमिका महत्वपूर्ण रहने बताउँदै आफ्ना बालबालिकाहरूलाई नियमित र समयमै मैदानमा पुर्याएर सहयोग गरिदिन अनुरोध गरेका छन् ।