कनकाई खबर \ झापाको कनकाई नगरपालिका—५, तुलसीवारीमा संचालित खुल्ला नकआउट फुटबल प्रतियोगितामा कनकाई —११ फुटबल क्लव फाइनलमा प्रवेश गरेको छ ।
मंगलबार भएको खेलमा कनकाई—११ फुटबल क्लबले मोरङ्गको श्रृजन मिडिया फुटबल क्लवलाई ५–० गोल अन्तरले पराजित गर्दै फाइनलको यात्रा तय गरेको हो । प्रतियोगिताको फाइनल खेलमा कनकाईले सयपत्री युवा क्लव इलामसँग प्रतिस्पर्धा गर्ने भएको छ । सयपत्रीले के एन के माइधारलाई २—० गोलको अन्तरले पराजित गर्दै फाइनलमा प्रवेश गरेको हो ।
कनकाई ५ स्थित वडा खेलकुद विकास समितिको आयोजना साथै कनकाई नगरपालिकाको आर्थिक सहयोगमा संचालन भएको प्रतियोगितामा कनकाई नगरपालिकाको टिमले एकपछि अर्को गोलको बर्षा गर्दै मोरङ्गको फुटबल क्लबलाई पाखा लगाएको हो ।
कनकाईका तर्फबाट सनम राई एक्लैले २ गोल गरे । उनी खेलको म्यान अफ द म्याच घोषित भए । कनकाईका लागि अर्का खेलाडी अर्जुन मर्डीले समेत थप २ गोल गरे भने कनकाईका तर्फबाट संदिप रसाइलीले समेत एक गोल थपे । एकतर्फी जस्तो बनेको खेलमा कनकाईका लागि सनमसँगै रोहन कार्की, आकाश कुँवर, अरुण श्रेष्ठ लगायतले उत्कृष्ट खेल प्रदर्शन गरेपछि पाहुना टोली पराजित बनेको हो ।
तुलसीवारीको खेल मैदानमा भइरहेको प्रतियोगितामा झापा, मोरङ्ग र इलामका १६ टिमको सहभागिता रहेको कनकाई ५ का खेलकुद विकास समितिका अध्यक्ष गंगा अधिकारीले बताए । प्रतियोगिताको फाइनल खेल बिहिवार हुने बताइएको छ ।
फाइनल खेलमा विजेता टिमले २५ हजार ५ सय ५५ र उपविजेताले १५ हजार ५ सय ५५ नगद, ट्रफि र प्रमाण पत्र प्राप्त गर्ने आयोजक समितिले जानकारी दिएको छ ।
