लक्ष्मी काफ्ले
झापा । नेपालको कृषिजन्य उत्पादन अलैँचीमा चीनले चासो देखाएको छ । चीनमा उत्पादन हुने आयुर्वेदिक औषधिमा अलैँची प्रयोग हुने भएकाले चीनले नेपालको अलैँचीप्रति चासो राखेको हो ।
नेपालको अलैँचीबारे अध्ययन गर्न चिनियाँ टोलीले पूर्वी नेपालको भ्रमण गरेको छ ।
चाइनिज मेडिसिन साइन्सका अध्यक्ष लिन ज्याङघिन नेतृत्वमा आएको सात सदस्यीय टोलीले झापा, इलाम, पाँचथर र ताप्लेजुङ भ्रमण गरेको हो ।
टोलीले ताप्लेजुङमा पुगेर अलैँची किसानलाई भेट्नुका साथै अलैँचीको बोटसम्मै पुगेर अध्ययन तथा अवलोकन गरेको छ ।
चिनियाँ टोलीले नेपाल अलैँची व्यवसायी महासंघका पदाधिकारीसँग आइतबार बिर्तामोडमा छलफलसमेत ग-यो ।नेपालको अलैँची भारत हुँदै विश्वबजारसम्म पुगे पनि चीनमा भने अहिलेसम्म नगएको अलैँची व्यवसायीहरूले बताएका छन् ।
चिनियाँ र भियतनामको भन्दा नेपालको अलैँची राम्रो
अलैँचीको अध्ययन गरिसकेपछि चीनको टोलीले नेपाली अलैँचीप्रति निकै चासो राखेको अलैँची व्यवसायी महासंघका केन्द्रीय अध्यक्ष निर्मल भट्टराईले बताए ।
‘चिनियाँ र भियतनामको अलैँचीभन्दा नेपालको अलैँची धेरै राम्रो छ,’ उनले भने, ‘नेपालको अलैँची गुणस्तरमा पनि फरक छ, मूल्यमा पनि अन्तर छ ।’
विश्वबजारमा नेपालको अलैँचीको माग दिनप्रतिदिन बढिरहेका वेला आफूहरू चीनले चाहेअनुसारको तरिकाले अलैँची पठाउन तयार रहेको अध्यक्ष भट्टराईले बताए । एयर कार्गोबाट अलैँची चीन पठाइने अध्यक्ष उनको भनाइ छ ।
विश्वको ७०% अलैँची उत्पादन नेपालमा
चीनलाई आवश्यक पर्नेजति परिमाणमा अलैँची पठाउन आफूहरू तयार रहेको अलैँची व्यवसायी महासंघका महासचिव ओमकृष्ण विमलीले बताए ।
अलैँची व्यवसायी महासंघका अनुसार विश्वको ७० प्रतिशत अलैँची उत्पादन नेपालमा हुन्छ । नेपालको ८० प्रतिशत अलैँची प्रदेश १ मा उत्पादन हन्छ ।
सबैभन्दा बढी अलैँची उत्पादन हुने जिल्ला ताप्लेजुङ हो । नेपालबाट अलैँची चीनमा जान थालेपछि यहाँ उत्पादित अलैँची अपुग हुने महासचिव विमलीको भनाइ छ ।
‘चीनको टोलीले प्लान्टेसनदेखि गुणस्तरसम्म हेरेको छ, चीनमा अलैँची धेरै खपत भए पनि त्यहाँको अलैँची हाम्रोभन्दा अलिक फरक हुँदोरहेछ,’ महासंघका अध्यक्ष भट्टराईले भने, ‘उहाँहरूले चीनमा हाम्रो अलैँची परीक्षण गर्ने हुनुभएको छ, यदि परीक्षण सफल भयो भने नेपालमा उत्पादन हुने सबै अलैँची उहाँहरू नै लैजान तयार हुनुहुन्छ ।’
के भन्छ चिनियाँ टोली ?
चिनियाँ टोलीले नेपालबाट अलैँची खरिद गर्न पहल गर्ने बताएको छ ।
‘चीनमा अलैँची आयुर्वेदिक औषधिका लागि लोकप्रिय छ, विश्वभरि नै चीनको औषधिको ठूलो भूमिका पनि छ,’ चाइनिज मेडिसिन साइन्सका अध्यक्ष लिनले भने, ‘हालसम्म नेपालको अलैँची प्रयोग नभए पनि अब हामीले पहल गरेपछि पक्कै यसले चीनको बजारमा पनि स्थान पाउनेछ ।’
