झापाको गौरादहमा हजुरआमाको हत्या गर्ने नातिसहित चारजनालाई प्रहरीले पक्राउ गरेको छ ।
गौरादह नगरपालिका–७ निवासी ८२ वर्षीया वृद्धा नरमाया विकको हत्या गरी शव गाडिएको अवस्थामा फेला परेको हो । बृद्धा नरमाया विकको हत्या आरोपमा नाति १७ वर्षीय धिरज विकसहित चार जनालाई आज दिउँसो नियन्त्रणमा लिएको जिल्ला प्रहरी कार्यालय झापाका प्रहरी उपरीक्षक मिलन केसीले जानकारी दिए ।
घटना फागुन २५ गते शिवरात्रिको मध्यरातको हो । लागूऔषध सेवन गरेका धिरजले वृद्धा हजुरआमा नरमायाको टाउकोमा रड प्रहार गरी हत्या गरेको प्रारम्भिक अनुसन्धानबाट खुलेको प्रहरी उपरीक्षक केसीले बताए । हत्यापश्चात् उनको शव ग्वालीमा लगेर पुरेका थिए । पाँच दिनदेखि आमा हराइरहेको भन्दै उनका छोरा रमेश विकले आज बिहान प्रहरीमा उजुरी दिएका थिए ।
‘प्रहरीमा उजुरी परेलगत्तै अनुसन्धान गर्दै जाँदा उनको हत्या भइसकेको र शव ग्वालीमा गाडिएको अवस्थामा फेला प¥यो,’ प्रहरी उपरीक्षक केसीले भने ।
नाति धिरजले हत्या गरेको प्रहरीसमक्ष स्वीकार गरिसकेको केसीले जानकारी दिए । धिरजले दिएको बयान अनुसार उनका साथीहरु टंक दर्नाल, राजु मल्लिक र बहादुर दर्जीलाई पनि प्रहरीले नियन्त्रणमा लिएको छ । धिरजको संलग्नता पुष्टि भएपनि उनका साथीहरुको संलग्नताको विषयमा छानबिन भइरहेको प्रहरी उपरीक्षक केसीले बताए । शिवरात्रिका दिन लागूऔषध सेवन गरी धिरज पैसा माग्न हजुरआमालाई भेट्न घर पुगेका थिए । घरमा अरू कोही सदस्य नभएको बेला हजुरआमासँग पैसाको विषयमा विवाद भएको र धिरजले नशाको झोकमा हजुरआमाको हत्या गरेको हुन सक्ने प्रहरीले अनुमान गरेको छ ।
