कनकाई खबर \ झापाको सुरुङ्गामा भएको सरोकारवालाहरुको एक भेलामा बजार क्षेत्रसहित आसपासमा हुने ध्वनी प्रदुषणलाई रोक लगाउँन स्थानीय सरकारसँग माग गरिएको छ ।
बजार सहित आसपासका क्षेत्रमा हुने गरेका ध्वनी प्रदुषणलाई न्युनीकरण गर्न, चर्को आवाजका साथ गरिने विभिन्न प्रचार साथै सुचनामूलक माइकिङको प्रयोगमा रोक लगाउँन सरोकारवालाले स्थानीय सरकारलाई अनुरोध गरेका हुन् । कनकाई–३ स्थित वडा कार्यालयमा भएको सरोकारवालाहरुको भेलालाई सम्बोधन गर्दै स्थानीय सरकार कनकाई नगरपालिकाका प्रमुख राजेन्द्रकुमार पोखरेलले विभिन्न व्यपार–व्यवसाय साथै कार्यक्रमको जानकारीकालागी गरिने माइकिङको चर्को आवाजले कसैलाई पनि फाइदा नहुने भन्दै सुचना प्रवाह साथै प्रचार–प्रसारको स्वरुप बदल्न सम्बन्धित सबैलाई अनुरोध गरेका छन् । यसले अध्ययन अध्यापनमा लागेका विद्यार्थी, शिक्षक, अभिभावक साथै अस्वस्थ भई विरामी परेका हरेक नागरिकलाई प्रत्यक्ष असर परेको भन्दै नगर प्रमुख पोखरेलले ध्वनी प्रदुषणलाई क्रमिक रुपले निरुत्साहित गर्नु पर्नेमा जोड दिए ।
अर्को प्रसङ्गमा नगर प्रमुख पोखरेलले स्मार्ट सिटीको अवधारणा अनुरुप लोकमार्गसँग जोडिएका कनकाई नगर क्षेत्रका मुख्य बजार सुरुङ्गा, दुर्गापुर र लक्ष्मीपुर बजारलाई क्रमिक रुपले विभिन्न चरणका कार्यक्रम अन्तर्गत व्यवस्थित गर्ने प्रयास भइरहेको बताए । सबैको साझा प्रयासले नगर क्षेत्रलाई सुन्दर, सफा साथै उज्यालो नगरी बनाउँन सकिने भन्दै नगर प्रमुख पोखरेलले नगरबासीबाट आँफूले रचनात्मक सल्लाह सुझावको अपेक्षा राखेको बताए।
