कनकाई खबर \ झापाको कनकाईमा सम्पन्न वडा स्तरीय नकआउट फुटबल प्रतियोगिताको उपाधी वडा नम्बर ५ ले हात पारेको छ ।
नेपाल खेलकुद महासंघ कनकाई नगर समितिले आयोजना गरेको प्रतियोगिताको फाइनल खेलमा वडा नम्बर २ लाई ० \ २ गोल अन्तरले हराउँदै वडा नम्बर ५ ले उपाधी हात पारेको हो । कनकाई ५ का जर्सी नं. १० का मनिष लिम्बू र जर्सी नं. २८ का साहिल लिम्बुको एक एक गोलबाट टिमले अग्रता लिएको हो ।
नेपाल खेलकुद महासंघ कनकाई नगर कमिटिको आयोजनामा भएको प्रथम वडा स्तरीय नकाउट फुटबल प्रतियोगिताको उपाधीसँगै बिजेता टिमले नगद ३१ हजार सहित ट्रफी,मेडल र प्रमाणपत्र हात पारेको छ । उपविजेता बनेको वडा नम्बर २ ले २१ हजार प्राप्त गरेको आयोजक समितिका अध्यक्ष गोबिन्द सुबेदीले जानकारी दिए । विजेता र उपविजेता टिमलाई नेपाल खेलकुद महासंघ कोशी प्रदेशका अध्यक्ष राजकुमार थापाले पुरस्कार वितरण गरे ।
फाईनल खेलको म्यान अफ द म्याच कनकाई ५ का साहिल बस्नेत भए भने सर्वाधिक गोलकर्ता वडा नं. ५ कै रुचन लिम्बु र प्रतियोगिता भर उत्कृष्ट खेल प्रदर्शन गर्ने वडा नम्बर ५ का मनिष लिम्बु घोषित भए । गत १६ गते बाट शुरु भएको खेलमा कनकाईका नौ वटै वडाका टिमले सहभागीता जनाएको खेल संयोजक पूर्ण लिम्बूले जानकारी दिए ।
नेपाल खेलकुद महासंघ कनकाई नगर समितिका अध्यक्ष गोविन्द सुवेदीको अध्यक्षता एवं महासंघ कोशी प्रदेशका अध्यक्ष राजकुमार थापाको प्रमुख आतिथ्यमा सम्पन्न प्रतियोगितामा महासंघका केन्द्रिय सदस्य एवं झापा ईञ्चार्ज रवन खरेल, केन्द्रिय लेखा आयोगका पुर्व सचिव सुनिल भेटवाल, कनकाई ५ का वडाअध्यक्ष कृष्ण राई लगायत विभिन्न राजनीतिक दल एवं सामाजिक संघसंस्थाका प्रमुख तथा प्रतिनिधिहरुको सहभागीता रहेको थियो । औपचारिक कार्यक्रमको संचालन महासंघ जिल्ला समिति सचिवालय सदस्य एवं कनकाई २ का वडाअध्यक्ष बलराम राई (प्रताप) ले गरेका थिए ।
