कनकाई खबर \ झापाको सुरुङ्गामा जारी दोस्रो फुड फेस्टिवल तथा साँस्कृतिक पर्यटन प्रवद्र्धन महोत्सवमा आज मंगलबार साँझ चर्चित गायिका मेलिना राईको विशेष प्रस्तुती रहने भएको छ ।
बैशाख ११ गते समुद्घाटन भएको महोत्सवको नवौं दिन आज (मंगलवार) गायिका राईको बेजोड प्रस्तुति रहने आयोजक होटल व्यवसायी संघ झापाकी अध्यक्ष इन्दिरा श्रेष्ठले जानकारी दिएकी छन् । होटल ब्यवसायी संघ झापाको आयोजना तथा संघको क्षेत्रीय समिति सुरुङ्गा सह–आयोजक रहेको महोत्सव कनकाई–३ सुरुङ्गास्थित कृषि उपज बजार क्षेत्रमा संचालनमा रहेको छ । महोत्सव २३ गते शनिवार सम्म संचालन हुने बताइएको छ ।
फुड फेस्टिवल महोत्सवमा स्थानीय स्तरका विभिन्न जनजातीका संस्कृति झल्कने खानाका परिकार भएका स्टल राखिएको आयोजक समितिका संयोजक संघका जिल्ला सचिव ख्याम ओलीले जानकारी दिए ।
महोत्सवमा स्थानीय तथा राष्ट्रिय कलाकारहरूको प्रस्तुतिका साथमा विशेष खाद्य परिकारका विभिन्न स्टलहरू रहेको बताइएको छ । त्यस्तै महोत्सवमा शान्ति सुरक्षाको राम्रो व्यवस्था गरिएकोले ढुक्क भएर मनोरञ्जन लिन होटल व्यवसायी संघ क्षेत्रीय समिति सुरुङ्गाका संयोजक कुमार श्रेष्ठले सबैलाई आग्रह गरेका छन् ।
