सुरुङ्गा / कनकाई नगरपालिका ३ सुरुङ्गास्थित दोमुखा बहुउद्येश्यीय सहकारी संस्था लि.ले विभिन्न उपयोगी सहयोग सामाग्री वितरण गर्दै संस्थाको २१ औं वार्षिक उत्सव मनाएको छ ।
विहान बेलुका हातमुख जोड्न धौ धौ परिरहेका अति विपन्न समुदायका असक्त, अपाङ्ग, वृद्धवृद्धाको पहिचान गरी कनकाई ४ स्थित कोटीहोम क्षेत्रमा आश्रय लिईरहेका ३० जाना सर्वसाधारणलाई मंगलवार सहकारी संस्थाको तर्फवाट खाद्य सामाग्री वितरण गरिएको हो । संस्थाकी उपाध्यक्ष एवम् वार्षिक उत्सव समारोह संचालन समितिकी संयोजक गोमादेवी निरौला ढुङ्गेलको सभापतित्वमा कोटीहोम परिसरमै कार्यक्रमको आयोजना गरि सहयोग सामाग्री वितरण गरिएको हो । वार्षिक उत्सवकै अवसरमा संस्थाले कनकाई २ स्थित धार्मिक तथा पर्यटकीय क्षेत्र धनुषकोटी धाममा संचालित संस्कृत पाठशालामा अध्ययन गर्ने १३ जना विद्यार्थीहरुलाई आवश्यक पुस्तक, लत्ताकपडा एवम् खाद्य सामाग्री वितरण गरेको संस्थाका व्यवस्थापक रमेश बारकोटीले वताएका छन् ।
पाठशाला परिसरमै आयोजना गरिएको कार्यक्रममा प्रमुख अतिथी कनकाई २ का वडाअध्यक्ष परशुराम गिरीले सहयोग सामाग्री वितरण गरेका हुन् । दुवै स्थानमा सामाग्री वितरण गर्दै कार्यक्रमका प्रमुख अतिथी वडाअध्यक्ष गिरीले सामाजिक क्षेत्रमा सहकारीले गरेको यस किसिमको सहयोगले स्थानीय सरकारलाई समेत सचेत गराएको भन्दै खुशी व्यक्त गरेका छन् । हरेक वर्ष सहकारी संस्थाले आफ्नो वार्षिक उत्सवको अवसरमा सामाजिक गतिविधीमा सक्रियता देखाउँदै अघि बढ्ने जनाएको छ । संस्थाका सचिव भरत थपलियाले स्वागत तथा लेखा समिति सदस्य तेजवहादुर प्रधानले संचालन गरेको कार्यक्रममा सुकेडाँगी सामुदायिक वनका अध्यक्ष भक्तवहादुर पौडेल, प्यारागन एकाडेमीकी संस्थापक अध्यक्ष चम्पा सुवेदी लगायतले मन्तव्य राख्दै सामाजिक क्षेत्रमा सहकारी संस्थाले गरेको कार्यको प्रशंसा गरेका थिए ।
