प्रकाशकीय /
धार्मिक, ऐतिहासिक तथा पर्यटकीय नगरी झापाको मुटु कनकाई नगरमा प्रधान कार्यालय स्थापना गरी ‘खबर भित्रको खबर’ को मूल मर्मसहित सुरु भएको कनकाई खबर साप्ताहिक आफ्नो स्थापनाको आठ वर्ष पूरा गरी नवौं वर्षमा प्रवेश गरेको छ।
मोफसलको माटोबाट निष्पक्ष र व्यावसायिक पत्रकारिताको जग बसाल्दै आजको प्रविधिमैत्री अनलाइन संस्करणसम्म आइपुग्दा हामीले भोगेका चुनौती, हासिल गरेका उपलब्धि र पाएको अपार जनविश्वास हाम्रालागि अमूल्य पूँजी बनेका छन्। नवौं वर्षको यो सुखद र ऐतिहासिक प्रस्थानविन्दुमा उभिएर समीक्षा गर्दा हामी गौरव र दायित्वबोधको एकैसाथ अनुभूत गरिरहेका छौं।
यो गौरवमय यात्रा यहाँसम्म आइपुग्नुमा हाम्रा आदरणीय पाठकवर्गको अटुट भरोसा, विज्ञापनदाताहरूको निरन्तर सहयोग, लेखक तथा स्तम्भकारहरूको बौद्धिक योगदान, देश–विदेशमा रहेका शुभचिन्तकहरूको रचनात्मक सुझाव र मरिहत्ते गरेर अहोरात्र खटिने कार्यदल -संवाददाता तथा कर्मचारी परिवार) को पसिना मुख्य कडी हो। यतिबेला कनकाई खबर साप्ताहिक तथा कनकाई खबर डटकमको तर्फबाट यस सञ्चार माध्यमको सुरुवाती अवस्थादेखि आजसम्म विभिन्न कालखण्डमा साथ एवं सहयोग गर्ने सबै सबैमा हृदयदेखि नै हार्दिक कृतज्ञता एवं धन्यवाद ज्ञापन गर्दछौं ।
चुनौतीका बीच ८ वर्षको गौरवमय समीक्षा
पछिल्ला वर्षहरू सञ्चार जगत्कालागि सहज रहेनन्। प्रिन्ट मिडियाको सङकुचन, आर्थिक मन्दीको प्रत्यक्ष असर र सामाजिक सञ्जालको भ्रामक प्रचारका बीच पनि कनकाई खबरले आफ्नो व्यावसायिक मर्यादा र विश्वसनीयतामा कहिल्यै सम्झौता गरेन। हामीले केवल समाचार मात्र सम्प्रेषण गरेनौं, कनकाई नगर र समग्र झापा जिल्लाको आर्थिक, सामाजिक, धार्मिक एवं पर्यटकीय सम्भावनाहरूलाई उजागर गर्दै स्थानीय विकासको सारथी समेत बन्यौं।
सधैं शक्तिको प्रतिपक्षमा उभिएर, नागरिकको आवाजलाई बुलन्द गर्ने प्रयास गर्दै , सत्य र निष्पक्षताको कसीमा आफूलाई खार्ने काम हामीले निरन्तर गरिरह्यौं। छापा माध्यमको ओजलाई बचाउँदै अनलाइन संस्करण मार्फत हरपलको समाचार पाठक माझ पु¥याएर हामीले सबैको मन जित्न सफल भएको महसुस गरेका छौं ।
नवौं वर्षमा प्रवेश गरिरहँदा हामी केवल उत्सव मनाउनमा मात्र सीमित छैनौं। बदलिँदो प्रविधि, पाठकको चाहना र समाजको आवश्यकतालाई मध्यनजर गर्दै हामी आगामी दिनका लागि थप सशक्त बन्दै अघि बढ्ने कुरामा प्रतिबद्ध रहेको स्पष्ट पार्न चाहन्छौं ।
समयको मागसँगै हाम्रो डिजिटल सञ्चार माध्यम कनकाई खबर डटकमलाई अझ द्रुत, प्रविधिमैत्री र अन्तरक्रियात्मक बनाउने प्रयास भइरहेको, जसकालागि सम्पूर्ण पाठक बर्ग , विज्ञापन दाता, सहयोगी एवं शुभेच्छुक महानुभावहरुको सहाकार्य ,साथ सहयोगको निरन्तर आवश्यक्ता पर्ने कुरालाई पुनः स्मरण गराउँदछौं ।
अन्त्यमा, सञ्चार माध्यमको वास्तविक मालिक र ऊर्जा भनेकै यसका पाठक र शुभचिन्तक हुन्। विगतका कमीकमजोरीहरूलाई सुधार्दै, यहाँहरूको रचनात्मक आलोचना र सुझावलाई मार्गदर्शन मान्दै अघि बढ्ने प्रण गर्दछौं। आगामी दिनमा पनि यहाँहरूको माया, साथ र सहकार्य अझ प्रगाढ बन्नेछ भन्ने पूर्ण विश्वास लिएका छौं।
नवौं वर्ष प्रवेशको यस पावन अवसरमा पुनः सम्पूर्ण आदरणीय पाठक, विज्ञापनदाता, हाम्रा मार्गदर्शक अग्रज महानुभावहरु एवं सहयात्री मित्रहरूमा वडादशैं, शुभदिपावली, छठ पर्व, नेपाल सम्बत लगायतका पर्वहरुको शुभअवसरमा हार्दिक मंगलमय शुभकामना व्यक्त गर्दछौं ।
– रामप्रसाद निरौला -सम्पादक/प्रकाशक)