कनकाई खबर \ सुरुङ्गा खानेपानी तथा सरसफाइ उपभोक्ता संस्थाको अध्यक्षमा पुनः भीमप्रसाद अधिकारी निर्वाचित भएका छन् ।
दोश्रो कार्यकालकालागि निर्वाचित अधिकारीले १ हजार २ सय ८९ मत प्राप्त गरी विजयी बनेका हुन् । उनका प्रतिस्पर्धी प्रेमप्रसाद चुडाल (प्रकाश)ले १ हजार १ सय ३७ मत प्राप्त गरेका छन् । दुवैजना विचको अन्तर १५२ मतको रहेको बताइएको छ ।
नेपाली कांग्रेस, नेकपा एमाले, नेकपा माओवादी केन्द्र, राप्रपा,जसपा लगायतको दलबाट संयुक्त प्यानल निर्माण गरी निर्वाचनमा होमिएका थिए । प्रमुख राजनीतिक दल नेपाली कांग्रेसको तर्फबाट अध्यक्षका उम्मेद्वारका रुपमा नेपाली कांग्रेसका पुर्व क्षेत्रीय सभापति तथा कनकाई बहुमुखी क्याम्पस सुरुङ्गाका संचालक समितिका अध्यक्ष, सुरुङ्गा कनकाई साकोसका अध्यक्ष समेत रहेका चुडाललाई पछि पार्दै स्वतन्त्र तर्फका अधिकारी निर्वाचित भएका हुन् । राष्ट्रिय स्वतन्त्र पार्टीको समर्थनमा अध्यक्षको उम्मेद्वार बनेका अधिकारीले नेतृत्व गरेको साझा प्यानलमा अधिकांश स्वतन्त्र व्यक्तिहरु उम्मेद्वार रहेका थिए ।
नवनिर्वाचित अधिकारीले साविक सुरुङ्गा गाविसको दुई पटक अध्यक्ष रही पारदर्शी, सुशासन र मितव्ययीताको उदाहरणका रुपमा कार्य सम्पादन गरिसकेका छन् । अधिकारीको जीतको मुख्य आधार उनको भ्रष्टाचारमुक्त छबि र एक कुशल योजनाकार व्यक्तित्वलाई मतदाताले विश्वास गरेका छन् । स्वच्छ खानेपानीको बढ्दो मागलाई ध्यानमा राखी नयाँ ट्याङ्की निर्माण गरेर कनकाई नदीको घिर्लिङ क्षेत्रमा सम्पवैल बनाई प्राकृतिक पानी नेचुरल वाटर घरघरमा वितरण गर्ने योजनालाई निर्वाचन मार्फत आम उपभोक्ताले अनुमोदन समेत गरेका छन् ।
यसैगरी उपाध्यक्ष पदमा भने राजनीतिक दलका तर्फबाट उम्मेद्वार बनेका एमालेका राजेन्द्र उप्रेतीले १ हजार १ सय ६३ मत प्राप्त गरी निर्वाचित भएका छन् । उनका प्रतिस्पर्धी स्वतन्त्र तर्फका तिलचन्द्र उप्रेतीले १ हजार १ सय२२ मत प्राप्त गरेका छन् । दुवैजना उम्मेद्वारको अन्तर भने ४१ मतको रहेको बताइएको छ । सचिव पदमा समेत राजनीतिक दलका तर्फबाट उम्मेद्वार बनेका गोविन्दप्रसाद पौडेलले १ हजार २ सय ३ मत प्राप्त गरी विजय बनेका छन भने उनका प्रतिस्पर्धी कृष्णप्रसाद चुडालले १ हजार १ सय ५ मत ल्याएका छन् । सचिवका उम्मेद्वार विचको अन्तर ९८ मत रहेको बताइएको छ । कोषाध्यक्षमा समेत राजनीतिक दल तर्फका उम्मेद्वार खेम कार्कीले १ हजार २ सय १५ मत प्राप्त गरी विजयी बनेका छन् भने उनका प्रतिस्पर्धी धनवहादुर बोगटीले १ हजार ६२ मत प्राप्त गरे । कोषाध्यक्षका उम्मेद्वार विचको अन्तर १५३ को रहेको छ ।
यसै गरी सदस्यमा राजनीतिक दलको गठबन्धनबाट उम्मेद्वार बनेका सम्पुर्ण सदस्यहरु निर्वाचित बनेका छन् । यसरी निर्वाचित हुने सदस्यहरुमा क्रमशः गोपाल खरेल (१२५३), लक्ष्मीप्रसाद ओडारी(१२२६) र भरतकुमार श्रेष्ठ(११८९) तथा महिला सदस्यहरुमा शोभा प्रसाईँ खरेल(१२९०) र हरिमाया राई (१११२ ) मत प्राप्त गरी निर्वाचित भएका छन् । उपविजेता बनेका सदस्यहरुमा राजकुमार फुयालले ९६८ मत, खगप्रसाद प्रसार्इँले ९२८ मत र माधवप्रसाद पोखरेलले ९७७ मत प्राप्त गरेका छन् भने उपविजेता बनेका महिला सदस्य तर्फ देवीमाया न्यौपानेले ९५० मत र गोमादेवी निरौलाले १०१५ मत प्राप्त गरेको निर्वाचन समितिका संयोजक जनार्दन उप्रेतीले जानकारी दिए ।
सुरुङ्गा खानेपानीमा ४ हजार १ सय २८ मतदाता रहेकोमा २ हजार ६ सय १४ मत खसेको थियो । निर्वाचन सम्पन्न गर्न जनार्दन उप्रेती संयोजक, सोमनाथ उप्रेती र अम्बिकाचापागाईं ( सुवेदी) सदस्य रहेको ३ सदस्यीय निर्वाचन समितिको समन्वयमा शान्तीपुर्ण रुपमा निर्वाचन सम्पन्न भइ मतगणना समेत सम्पन्न भएको हो ।
