कनकाई खबर \ हावाहुरी, असिनासहितको बर्षाले झापाको कनकाई नगरपालिकामा मात्रै १२ सय हेक्टर क्षेत्रफलमा लगाइएको अन्नबालीमा क्षति पुुगेको केषि ज्ञान केन्द्र झापाले जनाएको छ ।
झापाका विभिन्न क्षेत्रमा शुक्रबार र शनिबार गरी हावाहुरी सहितको ठुलो बर्षा भएको छ । जसअन्तर्गत शुक्रबार बेलुका भएको असिनासहितको बर्षाले जिल्लाको कनकाई, विर्तामोड, भद्रपुर, हल्दीबारी लगायतका पालिकामा लगाइएको अन्नबालीमा ठुलो क्षति भएको छ । ज्ञान केन्द्रका प्रमुख सागर विष्ठका अनुसार कनकाई नगरपालिका क्षेत्रमा मात्रै १२ सय हेक्टर क्षेत्रफलमा लगाइएको बालीमा क्षति भएको छ ।
‘सुरुङ्गा पूर्व, लक्ष्मीपुर पश्चिम र घैलाडुब्बा उत्तर गरी २४ सय हेक्टर क्षेत्रमा ठुलो असिना सहितको बर्षा भएको ज्ञान केन्द्रले तथ्यांक संकलन गरेको छ ।’ उहाँले भन्नुभयो ‘जसमा १२ सय हेक्टर क्षेत्रफलमा भने अन्न तथा तरकारी बाली लगाइएको थियो उक्त अन्नबालीमा क्षति पुगेको छ ।’
हावाहुरीसहित आएको असिनापानीले कनकाई ७ मा ३ विगाह क्षेत्रफलमा लगाइएको भेडे खोर्सानी नष्ट भएको छ । साझेदारीमा भैरव कृषि तथा पशुपालन फर्म संचालन गर्दै आएका नरहरी शिवाकोटी, तुलसीप्रसाद शिवाकोटी र देवीप्रसाद प्रसाईँले १८ लाख रुपैंयाँ खर्च गरेर लगाएको भेडे खोर्सानी विक्रिकोलागी तयारी भइरहेको अवस्थामा एक्कासी आएको असिनापानीले ठूलो क्षती पुर्याएको फर्मका प्रोपाइटर नरहरी शिवाकोटीले जानकारी दिए । हाल बजार मन्दीको समयमा पनि होलसेल रेट प्रति केजी ९० रुपैंयाँमा विक्रि हुँदै आएको भेडे खोर्सानी सबै विक्रि भइसक्दा ७० लाख बढीमा विक्रि हुने शिवाकोटीले बताए । शिवाकोटीले ५ महिना अघि मात्र भेडे खोर्सानीका ३० हजार विरुवा लगाएको बताए ।
क्षति पुगेको बालीमा अधिकांश मकै र तरकारी बाली रहेको छ । ‘हिजो दिनभरी कनकाईको क्षति संकलन गर्यौँ अन्य पालिकासगँ पनि समन्वय भइरहेको छ ’ ज्ञान केन्द्रका प्रमुख विष्ठका अनुसार ‘पालिकासगँ समन्वय गरेर अन्य पालिकालको पनि क्षतिको विवरण लिनेछौँ ।’ ज्ञान केन्द्रको तथ्यांक अनुसार झापामा करिब ४० हजार हेक्टर क्षेत्रफलमा मकै बाली लगाइएको छ ।
