गुणस्तरीय सडक निर्माण गर्ने कार्यमा नगरपालिका प्रतिवद्ध छ ःनगर प्रमुख थोप्रा
कनकाई खबर \ झापाको पर्यटकीय क्षेत्र माइधार –दोमुखा सडक खण्ड निर्माणका क्रममा कमसल सामाग्री प्रयोग गरेर निर्माण कम्पनीले लापरवाही गरेको छ ।
सडक निर्माणको प्रारम्भिक चरणमै कमसल सामाग्री प्रयोग भएको भन्दै स्थानीयवासीबाट चर्को विरोध आएपछि शिवसताक्षी नगरपालिकाले गरेको अनुगमनका क्रममा निर्माण कम्पनीको कमजोरी प्रमाणित भएको हो । निर्माण कम्पनीले सडक क्षेत्रको ह्युमपाइप मर्मत गर्ने कार्य करिव सम्पन्न गरिसकेको अवस्थामा स्थानीयवासीसहित नगरपालिकाका ईन्जीनियर, प्राविधिक र नगर प्रमुख मेगाहाङ्ग थोप्राले सडकको अनुगमन गरी निर्माण भएको सडक खण्डमा डोजर प्रयोग गरेर भत्काएका छन् । शिवसताक्षी नगरपालिका वडा नं. १० मा पर्ने दोमुखा सडक खण्डको ह्युमपाइप मर्मत कार्यमा निर्माण कम्पनीले ह्युमपाइप हेडवालमा कमसल सामाग्री प्रयोग गरेका कारण प्रारम्भीक चरणमै सडक खण्डमा डोजर चलेको हो ।
शिवसताक्षी नगरपालिकाका प्रमुख थोप्राले निर्माण कम्पनीबाट निर्माण सामाग्री कमसल प्रयोग भएको जनगुनासो आएसँगै अनुगमनका क्रममा पर्खाल भत्काएर पुनः निर्माण गर्न निर्माण कम्पनीलाई निर्देशन दिए । लामो समय पछि निर्माण हुन थालेको माइधार –दोमुखा सडक खण्ड नगरपालिकाको गौरवसँग जोडिएको नगरप्रमुख थोप्राले जानकारी दिए । उनले भने, गुणस्तरीय सडक निर्माण गर्ने कार्यमा नगरपालिका प्रतिवद्ध छ । सडक तोकिएको मापदण्ड अनुसार नै बन्ने छ । नगरकापालिकाको तर्फबाट वडा कार्यालय, स्थानीय उपभोक्ता समेतलाई सडक निर्माण गर्दा अनुगमन गरिदिन आग्रह गरेको नगरप्रमुख थोप्राले जानकारी दिए ।
सडकको सरदारे दोमुखा क्षेत्रमा कल्भर्ड र ह्युमपाइप राख्ने काम भइरहेको निर्माण कम्पनीले जनाएको छ । कल्भर्ड निर्माण गर्दा केही सामाग्री कमसल भन्ने कुरा आएपछि नगरप्रमुखको रोहबरमा सामाग्री हटाई पुनः निर्माण गर्न सुरु गरिसकेको सतासी निर्माण कम्पनीका संचालक लोकेन्द्र श्रेष्ठले जानकारी दिए । उनले शिवसताक्षी नगरपालिका र स्थानीय उपभोक्ता, वडा कार्यालयलाई बेला–बेलामा अनुगमन गरेर कमी कमजोरी औंल्याइदिन समेत आग्रह गरेका छन् । मजुदरले काम गर्दै जाँदा कहीं कतै कमजोरी हुन सक्छ भन्ने कुरा स्विकार्दै निर्माण कम्पनीका संचालक श्रेष्ठले सच्याएर गुणस्तरीय सडक निर्माण गर्ने कुराको प्रतिवद्धता जनाए ।
कालो पत्रेकालागि ४ करोड २४ लाख ८३ हजार २४५ रकम विनियोजन गरिएको शिवसताक्षी नगरपालिकाले जनाएको छ । जसमा शिवसताक्षी नगरपालिकाको २ करोड २४ लाख ८३ हजार २४५ रुपैयाँ र संघीय समपुरक कोषको २ करोड रकम रहेको छ । सडक ढलरहित ७ मिटर चौडाइ कालोपत्रे हुनेछ । जसमा तीनवटा बक्स कलभर्ट र दुई वटा ह्युमपाइप सडकमा लाग्ने स्टमेन्टमा उल्लेख छ ।
