कनकाई खबर \ स्वर्णलक्ष्मी बचत तथा ऋण सहकारी संस्थाले शिवसताक्षी न.पा. ८ स्थित श्री झिलझिले माध्यमिक विद्यालयका गरिब तथा जेहन्दार विद्यार्थीहरुलाई स्कुल व्याग वितरण गरेको छ ।
स्वर्णलक्ष्मी सकोस सेवा केन्द्र झिलझिलेले १४ औं स्थापना दिवसको अवसरमा झिलझिले माध्यमिक विद्यालयका कक्षा १ देखि ५ सम्मका २५ जना विद्यार्थीलाई स्कुल व्याग वितरण गरिएको हो । सहकारीले मंगलबार सदस्यहरुलाई सहकारी शिक्षा समेत गराएको छ । सहकारीको व्यवस्थापक कमल कुमार घिमिरेले सहकारीले हालसम्म गरेको वित्तीय कारोबारका विषयमा प्रष्ट पारेका थिए । उनले स्वर्ण लक्ष्मी साकोसले वित्तीय कारोबारमा चुस्त र दुरुस्त रुपमा सदस्यको भावनालाई कदर गर्दै कारोबार गरेकाले बजारमा चलेको हल्लाको पछाडी नलाग्न समेत सुझाए । उनले सहकारी संस्था प्रति सदस्यको गुनासाहरु भए सुनाउन समेत आग्रह गरे ।
सदस्य शिक्षामा सहकारीको हालसम्म ११ करोड ४३ लाख ६८ हजार १०० शेयर पुँजी रहेको जानकारी गराइएको थियो । स्वर्ण लक्ष्मीमा ६२ करोड ८६ लाख १५ हजार ३११ बचत निक्षेप रहेको छ भने, ९८ करोड १३ लाख १० हजार ८३९ ऋण लगानी भएको जानकारी गराइएको थियो । कार्यक्रममा झिलझिले सेवा केन्द्रका सक्रिय रुपमा कारोबार गर्ने चार जना सदस्यहरु क्रमशः लक्ष्मी सम्वाहाम्फे, बलराम थपलिया, सूर्यकुमारी राजवंशी र श्याम कुमारी सुब्बालाई सम्मान तथा मायाको चिनो प्रदान गरिएको थियो ।
यसै अवसरमा संस्थाले सेवा केन्द्र झिलझिले मै निशुल्क आँखा शिविर सञ्चालन गरेको छ । आँखा शिविरमा विर्ताज्योति आँखा अस्पताल दमकका डा. मोती बरालको टोलीले सहजीकरण गरेको स्वर्ण लक्ष्मी बचत तथा ऋण सहकारी संस्थाले जनाएको छ । कार्यक्रममा बोल्दै शिवसताक्षी उद्योग वाणिज्य संघका अध्यक्ष यामनाथ काफ्लेले हिजो सहकारीले हामी प्रति गरेको योगदान नभुल्न आग्रह गरे । उनले कतिपय सहकारीहरुले जनतालाई धोका दिएका छन् । तर त्यसो हो भन्दैमा सबै सहकारीलाई एकै नजरले हेर्न नहुने बताए ।
त्यस्तै शिवसताक्षी नरपालिकाका वडा नं. ८ का अध्यक्ष सन्त फेउदिनले वित्तीय कारोबार चुस्त र दुरुस्त बनाउन सदस्यहरु पनि सक्रिय हुनु पर्ने धारणा राखे । सहकारीमा सहदस्यहरुको पनि उत्तिकै जिम्मेवार हुन्छन् । उनले भने, सहकारी र सदस्य परिपुरक भएर कारोबार गर्ने हो भने, सहकारीले मानिसको घरबार बेहाल पार्ने होइन , मानिसको घरबार जोड्ने हैसियत बनाउने बताए । झापाको दमकमा केन्द्रिय कार्यालय भएको स्वर्ण लक्ष्मी साकोसको हाल झिलझिले, सुरुङ्गा, गौरादह र उर्लाबारीमा सेवा केन्द्रहरु सञ्चालनमा रहेका छन् ।
