कनकाई खबर \ झापाको कनकाई –७ स्थित वडा कार्यालयमा तीन दिने साबुन, हर्पिक र फिनेल उत्पादन तालिम सम्पन्न भएको छ ।
नमस्ते टेक्निकल इन्स्टीच्युट एण्ड कन्सल्टेन्सी प्रा.लि. विर्तामोडको प्राविधिक सहयोग रहेको तालिमबाट कनकाईको वडा नं.७ का ३९ महिला लाभान्वीत भएको वडासमिति सदस्य भगन टुडुले जानकारी दिए । वडा कार्यालयको सभा हलमा तीन दिन सम्म संचालन भएको तालिमबाट महिलाहरुलाई उद्यमशिल बन्न सहयोग पुगेको भन्दै वडा नं.७ का वडाअध्यक्ष भिष्मभुषण सिटौलाले तालिममा सहभागी सबैलाई शुभकामना व्यक्त गरे ।
तालिममा सहभागीहरुले सिकेको सिपलाई व्यवहारमा उतार्नु पर्नेमा जोड दिँदै उत्पादन गरेका चीजहरुको बजारीकरणमा वडा समिति साथै कनकाई नगरपालिकाको कार्यालयले जिम्मेवारी लिनु पर्ने कुरामा जोड दिँदै पत्रकार रामप्रसाद निरौलाले तालिममा सिकेका सिप तत्काल प्रयोगमा ल्याउँन सुझाव दिए ।
मानिसलाई हरेक पल पलमा अतिआवश्यक पर्ने साबुन, फिनेल र हर्पिक जस्ता चिजहरु आफ्नै घरमा हरेक मानिसले सहजै बनाउँन सक्ने भएकाले मानव स्वास्थ्यमा समेत कुनै असर नपार्ने भन्दै कन्सल्टेन्सीका अध्यक्ष डि.एल. राजवंशीले यसको कच्चा पदार्थको मात्रा मिलाएर बनाउँनु पर्नेमा जोड दिए ।
कनकाई ७ का वडाअध्यक्ष सिटौलाको सभापतित्व एवं वडा सचिव ईन्द्र बजगाईँले संचालन गरेको कार्यक्रममा वडासदस्य अरुणा सुव्वा, प्रशिक्षक रोहिणीप्रसाद बराल, प्राविधिक स्मृत्ति कार्की, वडास्तरीय टोल विकास संस्था, टोल नंं.११ का संयोजक भिष्म उप्रेती, टोल नंं. १० का संयोजक टिकारम निरौला, सहभागीका तर्फबाट अमृता राई लगायतले शुभकामना मन्तव्य राखे ।
