कनकाई खबर \ प्रतिनिधि सभाका सभामुख देवराज घिमिरे र उपसभामुख इन्दिरा रानामगरलाई गृहनगर विर्तामोड नगरपालिकासहित एकदर्जन बढी अन्य पालिका एवं संघसंस्थाहरुले सम्मान गरेका छन् ।
विर्तामोड नगरपालिका परिसरमा भएको सम्मान, बधाई तथा शुभकामना विशेष कार्यक्रममा विर्तामोड नगरपालिकासहित माइ नगरपालिका इलाम, नेपाल पत्रकार महासंघ झापा, अलैंची व्यवसायी महासंघ लगायत विभिन्न व्यक्ति एवं संघसंस्थाले सम्मान गरेका हुन् । झापा क्षेत्र नम्बर २ का बासिन्दा समेत रहेका सभामुख र उपसभामुख दुवैजनालाई विर्तामोड नगरपालिकाका तर्फबाट नगरप्रमुख पवित्रा महतारा प्रसाईं, उपप्रमुख नगेन्द्रप्रसाद संग्रौला र प्रमुख प्रशासकीय अधिकृत विनोदकुमार न्यौपानेले दोसल्ला ओढाएर प्रंशसा पत्रसहित सम्मान गरेका हुन् ।
सभामुख घिमिरे नेकपा एमालेबाट प्रतिनिधि सभा सदस्यमा झापा निर्वाचन क्षेत्र नं.२ बाट प्रत्यक्ष निर्वाचित सांसद हुन् भने उपसभामुख राना राष्ट्रिय स्वतन्त्र पार्टीबाट निर्वाचित समानुपातिक सांसद हुन् । सम्मान ग्रहणपछि सम्बोधन गर्दै सभामुख घिमिरेले निर्वाचित भएपछि आँफूले प्राप्त गरेको सल्लाह, सुझावसहितको सम्मान साथै जिम्मेवारीले हर्ष र उत्साहसँगै गम्भिर बनाएको बताएका छन् । सभामुख घिमिरेले भने, ‘जनताको अभिमतको कदर गर्दै क्षेत्रको विकासका लागि अथक प्रयास गर्नेछु भन्ने बाचा लिएर संसद छिरेको मान्छेलाई राजनीतिक दलहरुको झगडा मिलाउने ठाउँमा पुर्याउनु भयो, यही थप जिम्मेवारीका लागि तपाईंहरुबाट प्राप्त सम्मानप्रति आभार व्यक्त गर्दछु ।’ राजनीतिक अस्थिरता र आर्थिक तरलताका कारण संकटमा परेको मुलुकलाई सही दिशा निर्देश गर्ने काममा आँफू कहिल्यै बिचल्ली नहुने भन्दै सभामुख घिमिरेले संसदबाट जनतालाई उत्तरदायी बनाउँने कुरामा आफ्नो भुमिकालाई प्रभावकारी बनाएर अघि बढ्ने प्रतिवद्धता जनाएका छन् ।
अर्का सम्मानित उपसभामुख राना मगरले पनि सभामुखसँग मिलेर काम गर्ने तथा झापाको विकासका लागि उल्लेखनीय योगदान गर्ने विश्वास दिलाइन् । सामाजिक क्षेत्रमा ३३ वर्ष सम्म काम गरिरहँदा राजनीतिका कारण देश संकटमा पुगेको भन्दै अब राजनीतिको माध्यमबाट समाज रुपान्तरणमा भूमिका खेल्न आँफू राजनीतिमा होमिएको उपसभामुख रानामगरले बताएकी छन् ।
सम्मान समारोहमा तत्कालीन संविधान सभाका सदस्य सुधिरकुमार शिवाकोटी र प्रदेश सांसद एकराज कार्कीले समसामयिक राजनीतिक विषयहरु उठान गर्दै सभामुख र उपसभामुख एउटै निर्वाचन क्षेत्रले पाउनु झापाका लागि गौरवको विषय भएको बताए । नगरप्रमुख प्रसाईको अध्यक्षतामा आयोजित सम्मान कार्यक्रममा आमन्त्रितहरुलाई उपप्रमुख सङग्रौलाले स्वागत गर्दै नगरबासीका तर्फबाट नागरिक अभिनन्दन गर्न पाउँदा खुसी लागेको बताए । उनले यस क्षेत्रका जनताको विकास प्रतिको अपेक्षा पूरा हुने विश्वास पनि व्यक्त गरेका थिए ।
