राम निरौला,
कनकाई खबर \ झापाको कनकाई नगरपालिकाले किसानलाई डिजिटल कृषि प्रविधिमा जोड्दै मोबाइल एप मार्फत कृषि उत्पादन र बजारका बारेमा जानकारी दिने भएको छ ।
हेफर नेपालले कनकाई नगरपालिकालाई कृषि सम्बन्धी सम्पूर्ण जानकारी दिने डिजिटल मेसिन (किओस्क) प्रदान गरेसँगै किसानलाई डिजिटल कृषि प्रविधिमा जोड्न लागिएको हो । कनकाई नगरपालिकाको सभाहलमा एक कार्यक्रमका बिच नगर प्रमुख राजेन्द्रकुमार पोखरेललाई संविधान सभा सदस्य एवं अभियान नेपालका अध्यक्ष प्रेम गिरी, हेफर नेपालका क्षेत्रीय प्रबन्धक दिपेश पोखरेल लगायतले डिजिटल मेसिन(किओस्क) हस्तान्तरण गरे ।
मेसिन ग्रहण गर्दै कनकाई नगरपालिकाका प्रमुख राजेन्द्रकुमार पोखरेलले कनकाई नगरपालिकालाई माया गरेर सहयोग गरेकोमा हेफर नेपालप्रति आभार प्रकट गरे । हेफर नेपालसँगको सहकार्य कनकाईमा नमुना बन्ने विश्वास व्यक्त गर्दै नगर प्रमुख पोखरेलले कृषिमा डिजिटल प्रविधिको प्रयोगसँगै कनकाई नगरपालिका कृषि प्रविधिका क्षेत्रमा एक कदम अगाडि बढेको बताए ।अब कनकाई नगरका किसानले आफूले कुन समयमा कुन बाली लगाउने भन्ने बारे मोबाइल एप मार्फत जानकारी पाउन सक्नु ठूलो उपलव्धी भएको नगर प्रमुख पोखरेल बताउँछन् ।
अभियान नेपालका अध्यक्ष प्रेम गिरीले स्थानीय स्तरमा रहेका कृषकहरुलाई कृषि सूचना प्रविधिमा पहुँच बढाई कृषि उत्पादन र कृषकको उत्पादकत्व बढाउने उद्येश्यका साथ कनकाई नगरपालिकालाई डिजिटल मेसिन (किओस्क) प्रदान गरिएको बताए । यसबाट कृषि सुचना तथा प्राविधिक परामर्श सेवा समेत प्रवाह गर्न सकिने गिरीले प्रष्ट पारे । किसानलाई मोबाइल एपमै विज्ञहरूको सेवा समेत उपलब्ध हुनेमा गिरीले जोड दिए । ‘बाली रोपाइँदेखि कटाइसम्मका हरेक पक्षलाई एपमा समेटिएको छ,’ गिरी भने, ‘यसले किसानलाई कुन समयमा के बाली लगाउने र बजारको खोजी कसरी गर्ने भन्ने समस्याबाट मुक्त गराउन मद्दत पुग्नेछ ।’
जिओ कृषि एप मार्फत किसानले बढीभन्दा बढी फाइदा लिन सक्ने र नगरपालिकाले यसको सञ्चालन र व्यवस्थापनमा विशेष ध्यान दिने कनकाई नगरपालिकाका कृषि शाखा प्रमुख यदुनाथ उप्रेतीले बताए । यो एप परीक्षणकै क्रममा कनकाई नगरपालिका क्षेत्रका २ सय ६५ जना किसान आबद्ध भइसकेको जानकारी दिँदै कृषि शाखा प्रमुख उप्रेतीले जिओ कृषि एपमा कनकाई नगर क्षेत्र भित्र लगाइने बढीभन्दा बढी बालीनालीलाई प्राथमिकताका साथ स्थान दिइने बताएका छन् । परीक्षणकै क्रममा यो एप प्रयोग गरिरहेका अगुवा किसानहरुले आफूहरूकालागि यो प्रविधि निकै उपयोगी र आवश्यक रहेको बताएका छन् ।
किसानलाई कृषि, पशुपालनको ज्ञान, मौसम र बजारको सुचना तथा जानकारी, रोग किराको पहिचान र समाधान सम्बन्धी जानकारी, प्राविधिक परामर्श तथा सहयोग र आवश्यक सुचनाहरुको प्रचार प्रसार, स्थानीय स्तरमा ईन्टरनेट र स्मार्ट मोवाईलमा पहुंच नभएका कृषकहरुलाई डिजिटल कृषि, पशु सुचना तथा परामर्श सेवा केन्द्र (ई चौतारी) मार्फत सेवा दिने लगायत विभिन्न महत्वपूर्ण कार्यहरु सोहि मेसिनबाट प्रदान गरिनेछ । त्यस्तै यस परियोजना अन्तर्गत कृषक खेतको प्रोफाईल र कृषकको उत्पादन योजनाको डिजिटल रेकर्ड राखी सोहि अनुरुप कृषकले हरेक दिन वा हप्तामा गर्नुपर्ने गतिविधि तालिकाको सुचना, मलखाद सम्बन्धी आवश्यक ज्ञान, खर्च लगानीको रेकर्ड लगायत अन्य थुप्रै सेवा सुविधाहरु यस किओस्क मेसिनबाट कृषकहरुले प्राप्त गर्न सक्ने जियो कृषि परियोजनाका प्राविधिक रामनाथ तिवारीले जानकारी दिए ।
पालिका भित्र सुचिकृत भएका कृषि फर्म, कृषक, कृषक समुहमा आवद्ध किसानहरुलाई जियो कृषिको मोवाईल एप सम्बन्धी अभिमुखीकरण प्रदान गर्नु पर्ने परियोजनाका प्राविधिक तिवारीले बताए । यस सुचना प्रणालीलाई व्यवस्थापन गर्न जिम्मेवार व्यक्ति फोकल पर्सन छनोट गरी, मेसीनलाई प्रभावकारी रुपमा सञ्चालन गर्नका लागि सुचना सहायता कक्ष स्थापना गर्नुपर्ने जस्ता कार्यक्रम अब नगरपालिकाले गर्नुपर्ने बताइएको छ ।
त्यस्तै डिजिटल कृषि सुचना प्रसारका लागि सम्पुर्ण प्राविधिक पक्षको जिम्मेवारी लिने, सम्बन्धित ठाउँको कृषि, मौसम, बजार तथा रोग किराको पहिचान सम्बन्धी जानकारी किसान, कर्मचारी, प्राविधिक वा सरोकारवालाको मोवाईल एप मार्फत प्रदान गर्ने, एप र मेसीन सम्बन्धि प्राविधिक जानकारी कर्मचारी प्राविधिकलाई प्रदान गर्ने, कृषिको विस्तार र सुचनाको प्रसारका लागि सरोकारवालासँग समन्वय गर्ने जस्ता कार्य जियो कृषि मार्फत गरिने बताइएको छ ।
