कनकाई खबर \ नगरवासीलाई कृषि तथा पशुपालनका क्षेत्रबाट रोजगारीसँग जोड्दै आयआर्जनमा वृद्धि गर्ने उद्येश्यका साथ पशुधनको संरक्षण र विकासकालागि स्थानीय सरकार कनकाई नगरपालिकाले नगरका हरेक टोल टोलमा पशु स्वास्थ्य शिविरलाई अभियानका रुपमा अघि बढाएको छ ।
ग्रामिण क्षेत्रका अधिकांश मानिसहरुको जिविकोपार्जनको मुख्य स्रोत कृषि तथा पशुपालन नै भएकाले कनकाई नगरवासीलाई स्वदेशमै आत्मनिर्भर बनाउँन स्थानीय सरकारले अभियान चलाएको कनकाई नगरपालिकाका प्रमुख राजेन्द्रकुमार पोखरेलले बताएका छन् ।
आज भन्दा पाँच वर्ष अघि नै निर्वाचनका समयमा आँफुले गरेको प्रतिवद्धतालाई व्यवहारमा उतार्न पहिलो कार्यकालबाटै कृषि तथा पशुपालनका क्षेत्रमा प्राथमिक्ताका साथ कार्यक्रम अघि बढाइएको नगर प्रमुख पोखरेलले बताए । जस अनुरुप किसानकालागि आम्दानीको मुख्य स्रोत बनेको कृषि तथा पशुपालनका क्षेत्रलाई वैज्ञानीक बनाउँने कनकाई नगरपालिकाको दिर्घकालिन योजना हाल कार्यान्वयन तर्फ अघि बढेको स्थानीय सरकार प्रमुख पोखरेलको भनाई छ ।
यसै क्रममा माघ २३ गतेदेखी फागुन २ गते सम्मकालागि पशु स्वास्थ्य तथा बाँझो पन निवारण सम्बन्धिको वृहत घुम्ती शिविर संचालन गरेको कनकाई नगरपालिकाले आज चौथो दिन सम्ममा करिव एक हजार परिवारका पशुचौपायको स्वास्थ्य परिक्षण गरिसकेको परियोजनाका संयोजक केशव खनालले बताए । नगरका हरेक टोल टोलमा भएको शिविरबाट स्थानीयबासी धेरै खुशी भएको संयोजक खनाल बताउँछन् ।
कनकाईको वडा नं.२ निवासी पशुपालक कृषक देवीमाया गुरुङले पशुचौपायको स्वास्थ्य सुरक्षाका विषयमा कनकाई नगरपालिकाले खेलेको भुमिकाप्रति आँफूहरुलाई थप हौसला जागेको बताएकी छन् । नगरका हरेक टोलमा हुने शिविरमा सम्बन्धित वडाका वडाअध्यक्षसहित वडासदस्यहरुको सक्रियता रहेको कनकाईको वडा नं.२ का वडाअध्यक्ष बलराम राईले जानकारी दिए । वडाअध्यक्ष राईले सबै वडाबासीलाई पशु स्वास्थ्य शिविरमा आफ्ना पशुचौपायको स्वास्थ्य परिक्षण गराउँन अनुरोध गरेका छन् । वडाअध्यक्ष राईको अध्यक्षतामा भएको कनकाई वडा नं.२ को स्वास्थ्य शिविर उद्घाटन समारोहको संक्षिप्त कार्यक्रमको संचालन सामुदायिक सहजकर्ता चन्दा सिटौलाले गरेकी थिइन् ।
