कनकाई खबर \ झापाको कनकाई—२ स्थित जानकी आधारभुत विद्यालयले आफ्नो ४४ औं वार्षिकोत्सव तथा अभिभावक दिवसको अवसरमा विद्यालयलाई योगदान दिने विभिन्न व्यक्तित्वहरुलाई सम्मान गरेको छ ।
विभिन्न साँस्कृतिक प्रस्तुतीसहितको कार्यक्रममा विद्यालयका पुर्व प्रधानाध्यापक, पुर्व शिक्षक, अक्षयय कोष दाता सहित १२ जना व्यक्तित्वहरु सम्मानित भएका छन् । सम्मानित हुनेहरुमा विद्यालयमा नगद ५ लाखको अक्षय कोष स्थापना गरिदिने दाता निर्धन उत्थान लघु वित्त संस्थाका कार्यकारी प्रमुख जनार्दनदेव पन्त, त्यस्तै विद्यालयलाई नगद ५०÷५० हजारका दरले सहयोग गर्ने दाताद्वय कनकाई नगरपालिका वडा नं.८ लक्ष्मीपुर निवासी रेखाकुमारी पोखरेल र विद्यालयकी पुर्व शिक्षिका कनकाई ३ निवासी सावित्रा बास्तोलालाई समेत सम्मान पत्रका साथ दोसल्ला ओढाएर सम्मान गरिएको छ । त्यस्तै विद्यालयका पाँचजना विद्यार्थीको शैक्षिक सामाग्री, विद्यालय पोशाकसहितको अभिभावकत्व ग्रहण गर्ने कनकाई—३ सुरुङ्गा निवासी डाक्टर ग्रिसा रावल थापालाई समेत सम्मान गरिएको छ ।
त्यस्तै सम्मानित हुनेहरुमा विद्यालयका पुर्व प्रधानाध्यापक भोलाप्रसाद ढुङ्गाना र लोकनाथ उप्रेती, पुर्व शिक्षकहरु रमेशकुमार राई, यशु मैनाली, कैलाश बराल, सीताराम रिसाल रहेका छन् । त्यस्तै विद्यालय व्यवस्थापन समितिका पुर्व अध्यक्ष भक्तवहादुर पौडेल र कार्यरत कर्मचारी दधिराम शर्मा ढकाललाई समेत दोसल्ला ओढाएर सम्मान पत्रका साथ सम्मान गरिएको विद्यालयका शिक्षक विज्ञान संग्रौलाले जानकारी दिए । विद्यालयको शैक्षिक स्तर वृद्धिकालागि पुर्व शिक्षक, दाता परिवार, व्यवस्थापन समितिका पदाधिकारीसहित ईमान्दार कर्मचारीबाट भएको योगदानको उच्च मुल्याङ्कन गर्दै आगामी दिनको उज्वल भविष्यको कामनाका साथ विद्यालयको तर्फबाट सम्मान गरिएको बताइएको छ ।
सम्मानित सबैलाई कार्यक्रमका प्रमुख अतिथी कनकाई नगरपालिकाका प्रमुख राजेन्द्रकुमार पोखरेल, उपप्रमुख आशा शिवाकोटी, विद्यालय व्यवस्थापन समितिका अध्यक्ष घनश्याम गुरागाईँ एवं प्रधानाध्यापक अम्बिका सुवेदी, कनकाई नगरपालिका शिक्षा शाखाका मेदनी पाठक लगायतले सम्मान गरेका हुन् । कार्यक्रममा प्रधानाध्यापक सुवेदीले विद्यालयको भावी योजनासहितको प्रतिवेदन प्रस्तुत गरेकी थिइन् । विद्यालय व्यवस्थापन समितिका अध्यक्ष घनश्याम गुरागाईँको सभापतित्वमा सम्पन्न कार्यक्रममा शिक्षक लेखनाथ सुवेदीको स्वागत तथा विज्ञान संग्रौलाको संचालन रहेको थियो ।
