कनकाई खबर /कनकाई नगरपालिकाका प्रमुख राजेन्द्रकुमार पोखरेलले तराईकै पहिलो सामुदायिक वनका रुपमा रहेको कनकाई सामुदायिक वनले संस्थागत विकास र आत्मनिर्भरताको क्षेत्रमा उदाहरणीय उपलब्धि हासिल गरेको बताएका छन्।
कनकाई सामुदायिक वनको २८औँ वार्षिक साधारणसभाको अवसरमा नवनिर्मित तालिम भवन उद्घाटन गर्दै नगर प्रमुख पोखरेलले वन समूहले आफ्नै स्रोत र साधनको सदुपयोग गरी यति ठूलो पूर्वाधार निर्माण गर्नु प्रशंसनीय र अनुकरणीय काम भएको बताएका हुन्।
साधारणसभाकै अवसरमा सञ्चार क्षेत्रमार्फत वनको विकासमा योगदान पु¥याएको भन्दै स्थानीय पत्रकार गोपाल पोखरेलसहित विभिन्न क्षेत्रका करिब दुई दर्जन व्यक्तित्वलाई सम्मानसमेत गरिएको छ।
वन परिसरमा निर्माण गरिएको कनकाई सामुदायिक बहुउद्देश्यीय तालिम भवन राज्यको कुनै पनि बजेट समावेश नगरी समूहको आन्तरिक आयस्रोतबाट करिब ३ करोड रुपैयाँको लागतमा निर्माण गरिएको हो। आधुनिक प्रविधि र आवश्यक सुविधासहित तयार गरिएको भवनमा व्यावसायिक, सामाजिक, शैक्षिक तथा विभिन्न प्रकृतिका तालिम, गोष्ठी, सभा र कार्यक्रम सञ्चालन गर्न सकिने व्यवस्था भएको बताइएको छ । सामुदायिक वनले वन संरक्षण र उपभोक्ताको हितसँगै आम्दानीलाई संस्थागत पूर्वाधार विकासमा समेत परिचालन गर्न सक्ने उदाहरण भवनले प्रस्तुत गरेको बताइएको छ।
सामुदायिक वनको स्रोत व्यवस्थापन, आर्थिक पारदर्शिता र संस्थागत क्षमताको उपयोगबाट यस्ता ठूला पूर्वाधार निर्माण सम्भव हुने सन्देश यो परियोजनाले दिएको छ। झापामा मात्र नभई देशभरका सामुदायिक संस्था तथा स्थानीय तहका लागि समेत यो निर्माण कार्य आत्मनिर्भर विकासको प्रेरणादायी नमुना बन्न सक्ने विश्वास गरिएको छ।
२८औँ वार्षिक साधारणसभाका अवसरमा सञ्चारको माध्यमबाट कनकाई सामुदायिक वनको संरक्षण, विकास र प्रवद्र्धनमा योगदान पु¥याएको भन्दै स्थानीय पत्रकार पोखरेललाई नगदसहित दोसल्ला र सम्मानपत्र प्रदान गरिएको थियो। पोखरेल कनकाई इन्साइट अनलाइनका सम्पादक, अनलाइन टीभी पत्रकार संघ कोशी प्रदेश समितिका सदस्य तथा कनकाई सुरुङ्गा प्रेस क्लबका सदस्य हुन्।
त्यसैगरी साहित्यकार डा. पुण्यप्रसाद सिग्देल, वन समूहका पूर्वअध्यक्ष रुद्रप्रसाद चिमरिया, उत्कृष्ट कर्मचारी नेत्रप्रसाद भट्टराई तथा विद्यार्थी समीर आचार्य, हेमन्त आचार्य र मिरा रिजाललाई सम्मान गरिएको थियो। ज्येष्ठ नागरिकतर्फ हेमलाल मिश्र, हरिमाया मैनाली, ओमप्रसाद पौडेल, पवित्रादेवी ढकाल, टीकाराम खवास, मिनकुमारी घिमिरे र ईश्वरीप्रसाद कट्टेल सम्मानित भए। फरक क्षमता भएका सन्तोषी विश्वकर्मा, प्रमिला मुर्मू, रामप्रसाद भुसाल र तिलक श्रेष्ठलाई पनि सम्मान गरिएको थियो। समूहको आठौँ कार्यसमितिका पदाधिकारी तथा सदस्यहरू, भवन निर्माणमा संलग्न मजदुर र प्राविधिकहरूलाई समेत सम्मान गरिएको थियो।
वन समूहका अध्यक्ष ख्यामप्रसाद ओलीको अध्यक्षतामा सम्पन्न कार्यक्रममा अध्यक्ष ओलीले संस्थाको वार्षिक गतिविधि, उपलब्धि तथा भावी योजनासहितको प्रगति प्रतिवेदन प्रस्तुत गरेका थिए। कोषाध्यक्ष श्रीप्रसाद खरेलले आर्थिक प्रतिवेदन प्रस्तुत गरेका थिए भने उपाध्यक्ष ललितबहादुर कार्कीले स्वागत मन्तव्य राखेका थिए। समूहकी सचिव मान्ता खरेलले सञ्चालन गरेको कार्यक्रममा कनकाई नगर क्षेत्रका जनप्रतिनिधि, विभिन्न संघसंस्थाका प्रमुख तथा प्रतिनिधि, सामाजिक अगुवा र स्थानीय व्यक्तित्वहरूको उपस्थिति रहेको थियो।
कार्यक्रममा देउकुमार थेबे, हीरा थापा, देवराज ओझा, बलराम रिसाल, ख्यामप्रसाद सिटौला, परशुराम गिरी, मातृका पोखरेल, अम्बिका खवास, नथुनिसिंह गैवार, स्वस्तिनन्दन सुवेदी, सुरेश खनाल, रोशन सुवेदी र युवराज चम्लागाईं, कृष्णमाया भुजेल लगायतको आतिथ्य रहेको थियो।
वन संरक्षणसँगै सामाजिक तथा संस्थागत विकासलाई समेत प्राथमिकतामा राख्दै अघि बढेको कनकाई सामुदायिक वनको २८औँ साधारणसभा नयाँ पूर्वाधारको उद्घाटन, योगदानकर्ताको सम्मान र संस्थागत उपलब्धिको समीक्षा गर्दै सम्पन्न भएको छ।