कनकाई खबर \ संघीय सरकारका स्वास्थ्य तथा जनसंख्या मन्त्री पदम गिरीले विपन्न परिवारकालागि न्यानो ओत दिने काम गर्दै आएको सहारा नेपाल साकोसले सरकारले गर्न नसकेको काम पनि गरेको भन्दै सहारा साकोसको खुलेर प्रशंसा गरेका छन् ।
झापाको विर्तामोड–२ मा मुख्य कार्यालय रहेको सहारा नेपाल साकोसको सोमबार पर्यटकीय क्षेत्र जामुनखाडीमा सम्पन्न दशौं विस्तारित भेलालाई सम्बोधन गर्दै मन्त्री गिरीले सामाजिक क्षेत्रमा सहाराको योगदानको चर्चा गर्दै नेपाल सरकारका तर्फबाट समेत संस्थालाई सहयोग गर्ने प्रतिवद्धता जनाए । मन्त्री गिरीले स्वास्थ्यका क्षेत्रमा राज्य गम्भिर नभएका कारण स्वास्थ्यको पहँचुबाट जनता असुरक्षित रहेकोमा दुःख व्यक्त गरे ।
आगामी दिनमा जनताले अनुभुति गर्ने गरीको काम गर्ने प्रतिवद्धता जनाउँदै मन्त्री गिरीले पालिका तहमा रहेका अस्पताललाई थप सुविधा सम्पन्न बनाउने बताएका छन् । मन्त्री गिरीले सबै नागरिकमा गुणस्तरीय स्वास्थ्य सेवाको पहुँच अभिवृद्धि गर्न सरकार लागिपरेको भन्दै सातवटै प्रदेशमा अत्याधुनिक अस्पताल बनाउने र नागरिकलाई बीमा मार्फत स्वास्थ्य सेवा उपलब्ध गराउने तयारीमा सरकार रहेको बताए ।
कार्यक्रममा प्रदेश १ का उद्योग, कषि तथा सहकारी मन्त्री सिटौलाले सहारा नेपाल साकोस सबै सहकारी संस्थाहरुको अभिभावक संस्था रहेको भन्दै विपन्न परिवारको समेत सहरा भएको बताए । संस्थाको आगामी दश वर्षे रणनीतिक योजनाकालागि सुझाव संकलनका साथै केन्द्र र प्रदेशका दुई मन्त्रीलाई सम्मान गर्दै संस्थाको दशौं विस्तारित भेला सम्पन्न भएको हो ।
सहारा नेपाल साकोसले संघीय सरकारका स्वास्थ्य तथा जनसंख्या मन्त्री पदम गिरी र प्रदेश १ का उद्योग, कृषि तथा सहकारी मन्त्री भक्तिप्रसाद सिटौलालाई संस्थाका अध्यक्ष हरिबहादुर राजवंशी र प्रमुख कार्यकारी अधिकृत महेन्द्रकुमार गिरीले सम्मान–पत्र प्रदान गर्दै कार्य सफलताको शुभकामना व्यक्त गरेका थिए ।
कार्यक्रममा संस्थाका प्रमुख कार्यकारी अधिकृत गिरीले आगामी १० वर्षे रणनीतिक योजनाका बारेमा छलफल गर्न र सुझाव संकलन गर्न कार्यक्रमको आयोजना गरिएको बताए । प्रमुख कार्यकारी अधिकृत गिरीले संस्थाको आगामी १० वर्षे कार्यदिशाका बारेमा जानकारी गराउँदै यसका रणनीतिक योजना तर्जुमा गर्नुअघि सदस्यहरुबाट सुझाव संकलन गरेर विज्ञहरुसँग परामर्श गर्नका लागि विस्तारित बैठक गरिएको बताए । संस्थाले मिसन २०८८, सदस्य सुनौ, सदस्य बनौं अभियान, कोष तथा तरलता व्यवस्थापन, आन्तरिक स्रोत बृद्धिका लागि बचतमा प्राथमिकता, ऊर्जा क्षेत्र सहयोग कार्यक्रम, उद्यमशीलता विकास र रोजगारी सिर्जना, सदस्यहरुको स्वास्थ्य सेवामा पहुँच लगायतका १७ वटा बुँदामा आफ्नो कार्यदिशा तय गरेको छ ।
कार्यक्रममा कनकाई नगरपालिकाका प्रमुख राजेन्द्रकुमार पोखरेलले सहारा नेपाल साकोसको सहकार्यमा नगरमा धेरै राम्रा काम गरेको जानकारी दिए । ज्येष्ठ नागरिक, शिक्षा र विपन्न आवास लगायतका क्षेत्रमा सहारा नेपालसँगको सहकार्यमा धेरै काम नगरपालिकाले गरेको नगरप्रमुख पोखरेलको भनाई छ । कार्यक्रममा राष्ट्रिय सहकारी महासंघका अध्यक्ष मीनराज कँडेल, राष्ट्रिय सहकारी महासंघका सल्लाहकार कमलप्रसाद चौलागाईं, राष्ट्रिय सहकारी बैंकका अध्यक्ष केवी उप्रेती लगायतले नेपालको वर्तमान सहकारीको अवस्था, अप्ठ्यारा, अवसर लगायतका बारेमा चर्चा गरेका थिए ।
संस्थाका अध्यक्ष हरिबहादुर राजवंशीको अध्यक्षतामा भएको कार्यक्रममा संस्थाका बरिष्ठ उपाध्यक्ष हरिप्रसाद निरौलाले स्वागत गरेका थिए । कार्यक्रमको सञ्चालन पत्रकार केशव भट्टराईले गरेका थिए ।
