कनकाई खबर \ झापाको सुरुङ्गामा जारी प्रदेश नं.१ स्तरीय अन्तरपालिका पुरुष भलिबल प्रतियोगिताको फाइलन खेल दमक नगरपालिका र झापा गाउँपालिका विच हुने भएको छ ।
सुरुङ्गा जेसीजले कनकाई भलिबल कपको तेस्रो संस्करणका रुपमा संचालन गरेको प्रतियोगिताको शुक्रबार भएको दुईवटा खेलबाट दमक र झापा गाउँपालिकाले फाइनलको यात्रा तय गरेको हो ।
शिवसताक्षी र दमक नगरपालिका बिच भएको प्रतियोगिताको पहिलो खेलमा शिवसताक्षीलाई २५\१२, २५\१७ र २५\२१ को सोझो सेटले पछि पार्दै दमकले फाइनलको यात्रा तय गरेको हो । खेलको म्यान अफ द म्याच दमकका पुकार तामाङ घोषित भएका थिए । उनले नगद एक हजार सहित ट्रफी प्राप्त गरे ।
त्यसपछि दोस्रो खेल झापा गाउँपालिका र बुद्धशान्ती विच भएको थियो । तीन जना भारतीय खेलाडीसहित विर्तामोडका बिमान खड्काको कप्तानीमा मैदानमा उत्रिएको बुद्धशान्तीको झापा गाउँपालिकासँग केही चलेन । झापाले २५\२०, १८\२५ , २५\१९ र २५\२२ को सेटमा बुद्धशान्तीलाई पाखा लगाएको हो ।
खेलको म्यान अफ द म्याच झापाका समिप श्रेष्ठ घोषित भए । श्रेष्ठलाई सुरुङ्गा जेसीजकी अध्यक्ष सुष्मा उप्रेती र खेल संयोजक प्रतापबाबु जमरकट्टेलले नगद एक हजार सहित ट्रफी प्रदान गरे ।
नकआउट प्रतियोगिताका आधारमा खेलाइने खेलको शनिवार हुने फाइनलमा प्रथम हुने टिमले १ लाख १ हजार १११ , द्वितीय हुने टिमले ६१ हजार १११ र तृतीय हुने टिमले २५ हजार नगद पुरस्कार, ट्रफी र प्रमाण पत्र प्राप्त गर्नेछन् । त्यस्तै बेष्ट स्पाइकर , बेष्ट ब्लकर , बेष्ट डिफेन्स र बेष्ट क्वीकरलाई ५ हजार १ सय नगद पुरस्कार र ट्रफीको व्यवस्था गरिएको बताइएको छ । त्यस्तै म्यान अफ द सिरिजलाई २४ इन्चको रंगीन टि.भी पुरस्कार स्वरुप वितरण गरिने सुरुङ्गा जेसीज वर्ष २०२२ का महासचिव राजु पाठकले जानकारी दिए ।
माघ ३ गते सुरु भइ ७ गते समापन हुने प्रतियोगितामा कनकाई नगर खेलकुद विकास समिति सह–आयोजकका रुपमा रहेको छ । प्रतियोगितामा झापासहित मोरङ् र इलाम गरी तीन जिल्लाका ८ टीमले भाग लिएका थिए ।
नेपाल बहुउद्देश्यीय सहकारी संस्था(एनएमसी)मुख्य प्रायोजक रहेको प्रतियोगितामा प्रायोजकका रुपमा ओसियन एजुकेशन एण्ड भिसा सर्भिसेज समेत रहेको छ । प्रथम पुरस्कार विकास र अनु प्रसाईबाट आफ्ना भाइ स्व.विनोद प्रसाईको स्मृतिमा प्राप्त भएको छ भने द्वितीय पुरस्कार युवा पर्यटन व्यवसायी वीरेन्द्र मैनाली र तृतीय पुरस्कार आइएमई लाइफ इन्सुरेन्स कम्पनीले प्रायोजन गरेको सुरुङ्गा जेसीज वर्ष २०२२ की अध्यक्ष सुष्मा न्यौपाने उप्रेतीले बताएकी छन् ।
जेसीज अध्यक्ष उप्रेतीले दिएको जानकारी अनुसार शनिबार पहिलो खेल तेस्रो स्थानकालागि शिवसताक्षी र बुद्धशान्ती विच हुने जनाइएको छ ।
