बिराटनगर \ प्रदेश १ सरकारले आइतबार प्रदेशसभामा आउँदो आर्थिक वर्ष ०७६।७७ का लागि रु ४२ अर्ब २० करोड ४ लाख १२ हजार बजेट ल्याएको छ । प्रदेश १ सरकारका आर्थिक मामिला तथा योजनामन्त्री इन्द्रबहादुर आङबोले प्रस्तुत गरेको बजेटमा चालुतर्फ रु १८ अर्ब ५४ करोड ६४ लाख ७६ हजार र पुँजीगततर्फ रु २३ अर्ब ५७ करोड ३९ लाख ३४ हजार बजेट विनियोजन गरिएको छ ।
वित्तीय व्यवस्थापनतर्फ रु ८ करोड, अन्तर सरकारी हस्तान्तरणका लागि ९९ करोड ९९ लाख ९८ हजार विनियोजन गरेको मन्त्री आङ्बोले जनाए ।
आन्तरिक स्रोतबाट रु ३ अर्ब ८६ करोड, राजश्व बाँडफाँडबाट रु १० अर्ब ५२ करोड, अनुदलानबाट रु २१ अर्ब २१ करोड र ६ अर्ब ५९ करोड चालु आर्थिक वर्षको नगद मौजदात रहने अनुमान गरिएको मन्त्री आङबोले बताए । बजेटमा कृषि, पर्यटन, उद्योग, शिक्षा र पूर्वाधारलाई प्राथमिकतामा राखेको छ ।
स्थानीय तहलाई राजश्व बाँडफाँडबाट १ अर्ब ३ करोड र प्रदेशस्थित १ सय ३७ स्थानीय तहलाई रु ५० लाखको दरले १ अर्ब समानीकरण अनुदानका लागि बजेट बिनियोजन गरेको छ । प्रदेश निर्वाचन क्षेत्र पूर्वाधार विकास कार्यक्रमका लागि प्रत्येक निर्वाचन क्षेत्रमा रु २ करोड ५० लाखको दरले कूल रु १ अर्ब ४० करोड र निर्वाचन क्षेत्र विकास कार्यक्रमको रुपमा प्रदेश सभा सदस्यको सिफारिसमा रु ५० लाखको दरले ४८ करोड बजेट बिनियोजन गरेको छ ।
कृषि, पशुपंक्षी तथा सहकारी क्षेत्रका लागि ४ अर्ब, पर्यटन क्षेत्रको विकासका लागि रु १ अर्ब ६६ करोड, बन तथा वातावरण क्षेत्रमा रु १ अर्ब २० करोड, उद्योग बाणिज्य तथा आपूर्ति क्षेत्रमा रु ४७ करोड, सिँचाई तथा नदी नियन्त्रणमा ३ अर्ब २० करोड बजेट विनियोजन गरेको छ।
शिक्षामा रु १ अर्ब २८ करोड, सवास्थ्य क्षेत्रमा रु १ अर्ब ७ करोड, खानेपानी तथा सरसफाईमा रु ३ अर्ब, खेलकुद क्षेत्रको विकासका लागि रु ४७ करोड ५५ लाख, भोतिक पूर्वाधारतर्फ सडक र पुल निर्माणमा रु ८ अर्ब, आवास भवन तथा सहरी पूर्वाधारमा रु ३ अर्ब बजेट बिनियोजन गरेको छ ।
उर्जा तथा विद्युतमा श्रम तथा रोजगारी, सूचना तथा सञ्चार, निजी क्षेत्र तथा लगानी प्रवर्द्धन, सुशासन र सार्बजनिक सेवा प्रवाह, विपद व्यवस्थापन, लागुपदार्थ दुर्व्यसन नियन्त्रणका लागि समेत बजेट विनियोजन गरेको छ ।
