काठमाडौं \ वैदेशिक रोजगार व्यवसायी संघको निर्वाचनमा प्रगतिशिल समुहका महासचिवका उम्मेद्वार मिलन कट्टेलले व्यवसायीको सुरक्षाको जिम्मा आफूले लिने बताएका छन् ।
वैदेशिक रोजगार व्यवसायी एकता समिती सामाखुशीले आयोजना गरेको चुनाव प्रचार भेलालाई सम्बोधन गर्दै नेकपा एमाले निकट प्रगतिशिल वैदेशिक रोजगार मञ्च नेपालका तर्फबाट महासचिवका उम्मेद्वार बनेका झापाको कनकाईका युवा कट्टेलले यस व्यवसायमा विभिन्न पक्षबाट हुने आक्रमणको सामना गर्न आफूलाई महासचिवमा विजयी गराउन सबैलाई आग्रह गरेका छन् ।
‘मलाई निर्वाचित गरेर पठाएपछि तपाईंहरुको अफिसको सुरक्षा,व्यवसायको सुरक्षाा यो महासचिवले गर्नेछ’ कट्टेलले भने ‘त्यसका लागि आँट भएको,भिजन भएको नेतृत्वलाई जिताउनुहोस । ’ उनले व्यवसायीबाट मासिक र हप्ता असुल्नेहरुलाई ठेगान लगाउने चेतावनी दिएका छन् ।
कट्टेलले आफ्नो व्यवसाय इमान्दारितापूर्वक गर्दा कसैले आक्षेप लगाएमा, अनावश्यक चन्दा असुली गरेमा वा युट्युवरका नाममा आतंक मच्चाए त्यसको सामना आफूले गर्ने बताए । कट्टेलले वैदेशिक रोजगार व्यवसायी महासंघलाई राजनीति गर्ने थलो नभइ व्यवसायीका हक हितको थलो बनाउने प्रतिवद्धता व्यक्त गरे ।
एशिया लिंक सर्भिसेस प्राइभेट लिमिटेडका सञ्चालक अध्यक्ष कट्टेल आफू यो व्यवसायमा डेढ दशक देखि जोडिएकोले यस क्षेत्रमा यावत समस्याका बारेमा जानकार रहेको बताउँछन् । ३३ वर्षीय कट्टेलले वैदेशिक रोजगार व्यवसायलाई समाजलाई राम्रो छबी भएको पेशाको रुपमा स्थापित गर्न आफू लागि पर्ने बताएका छन् । माघ ६ गते संघको २९ औं साधारणसभासँगै नयाँ नेतृत्व चयन हुदैछ ।
