कनकाई खबर \ झापाको सुरुङ्गामा प्रदेश नं.१ स्तरीय अन्तरपालिका पुरुष भलिबल प्रतियोगिता संचालन हुने भएको छ ।
सुरुङ्गा जेसीजले कनकाई भलिबल कपको तेस्रो संस्करणका रुपमा संचालन गर्न लागेको प्रतियोगिता माघ३ गते सुरु भइ ७ गते समापन हुने आयोजक समितिले जनाएको छ । प्रतियोगितामा कनकाई नगर खेलकुद विकास समिति सहआयोजकका रुपमा रहेको छ ।
विगतमा सुरुङ्गा गोल्ड कप फुटबल प्रतियोगिता संचालन गरेर चर्चा कमाएको जेसीजले अब भलिबल खेललाई निरन्तरता दिने भएको छ । सुरुङ्गा जेसीजले पहिलो संस्करणमा वडास्तरीय र दोस्रो संस्करणमा समेत प्रदेश १को पालिका स्तरीय भलिबल प्रतियोगिता सफलतापुर्वक सम्पन्न गरिसकेको छ । आफ्नो वार्षिक कार्यक्रमका रुपमा यस वर्ष पनि कनकाई माविको खेल मैदानमा कनकाई भलिबल कपको तेस्रो संस्करणका रुपमा प्रदेश १ को पालिका स्तरिय भलिबल खेल संचालन हुन लागेको सुरुङ्गा जेसीज वर्ष २०२२ की अध्यक्ष सुष्मा न्यौपाने उप्रेतीले जानकारी दिएकी छन् ।युवाहरुमा लागूऔषध दुव्र्यसन, बेरोजगारी जस्ता समस्या बढिरहेका बेला खेलको माध्यमबाट व्यक्तित्व विकास गर्ने उद्धेश्यले नियमित रुपमा भलिबल प्रतियोगिता संचालन गर्दै जाने जेसीज अध्यक्ष उप्रेतीले बताएकी छन् ।
प्रतियोगितामा झापासहित मोरङ् र इलाम गरी तीन जिल्लाका ८ टीमले भाग लिने भएका छन् । झापाको झापा गाउँपालिका ,बुद्धशान्ति गाउँपालिका , भद्रपुर नगरपालिका , गौरादह नगरपालिका, शिवसताक्षी नगरपालिका , दमक नगरपालिका, इलामको चुलाचुली गाउँपालिका र मोरङको बेलवारी नगरपालिकाले भाग लिने झापा जिल्ला भलिबल संघका उपाध्यक्ष एवं पुर्व राष्ट्रिय खेलाडी समेत रहेका सुरुङ्गा जेसीज वर्ष २०२२का महासचिव दुर्गा पाठक(राजु)ले बताए । प्रतियोगितामा विभिन्न पालिकाबाट विदेशी खेलाडीहरुको समेत सहभागीता हुने भएकाले यस पटकको भलिबल खेल थप आकर्षक बन्ने विश्वास गरिएको छ ।
नकआउट प्रतियोगिताका आधारमा खेलाइने खेलमा प्रथम हुने टीमले १ लाख १ हजार १११ , द्वितीय हुने टीमले ६१ हजार १११ र तृतीय हुने टीमले २५ हजार नगद पुरस्कार, ट्रफी र प्रमाण पत्र प्राप्त गर्नेछन् । त्यस्तै बेष्ट स्पाइकर , बेष्ट ब्लकर , बेष्ट डिफेन्स र बेष्ट क्वीकरलाई ५ हजार १ सय नगद पुरस्कार र ट्रफीको व्यवस्था गरिएको बताइएको छ । त्यस्तै म्यान अफ द सिरिजलाई २४ इन्चको रंगीन टीभी पुरस्कार स्वरुप वितरण गरिने महासचिव पाठकले जानकारी दिए ।
कनकाई नगरपालिकासहित नगरका सबै वडा कार्यालयबाट समेत विशेष सहयोग प्राप्त भएको प्रतियोगिताकालागि झापाका अन्य पालिकाले समेत सहयोग गरेको कनकाई नगर खेलकुद विकास समितिका संयोजक समेत रहेका सुरुङ्गा जेसीजका पुर्वअध्यक्ष जविन तिम्सिनाले बताए । नेपाल बहुउद्देश्यीय सहकारी संस्था(एनएमसी) मुख्य प्रायोजक रहेको प्रतियोगितामा प्रायोजकका रुपमा ओसियन एजुकेशन एण्ड भिसा सर्भिसेज समेत रहेको छ ।
प्रथम पुरस्कार विकास–अनु प्रसाईबाट प्राप्त हुने छ भने द्वितीय पुरस्कार युवा पर्यटन व्यवसायी वीरेन्द्र मैनाली र तृतीय पुरस्कार आइएमई लाइफ इन्सुरेन्सले प्रायोजन गर्ने भएको छ । प्रतियोगिता सम्पन्न गर्न १२ लाख ३६ हजार रुपैयाँ खर्च हुने अनुमान गरिएको छ ।
सुरुङ्गा जेसीजले कार्यसमितिका जिम्मेवार पदाधिकारी सहित पुर्व अध्यक्षहरुको उपस्थितीमा एक संक्षिप्त कार्यक्रमको आयोजना गरी प्रतियोगिताको सम्पुर्ण तयारी पूरा भएको जनाएको छ । अध्यक्ष सुष्मा न्यौपाने उप्रेतीको सभापतित्वमा सम्पन्न कार्यक्रममा जेसीजका पूर्व अध्यक्षहरु कुमारमणि पोखरेल, शिव कँडेल, जविन तिम्सिना,कमल कट्टेल, वर्ष २०२२ का कार्यकारिणी उपाध्यक्ष दिपेन्द्र प्रधान, खेलकुद संयोजक प्रतापबाबु जमरकट्टेल , प्रकरण निर्देशक राजकुमार कट्टेलको सहभागिता रहेको थियो । गत वर्ष दमकले उपाधि हात पारेको यस प्रतियोगिताको उद्घाटन खेल माघ ३ गते भद्रपुर र दमक नगरपालिकाबीच हुने जनाइएको छ ।
