कनकाइ / विश्व वातावरण दिवसको अवसर पारेर कनकाई सामुदायिक वन सुरुङ्गाले वुधवार वृक्षरोपण कार्यक्रम सम्पन्न गरेको छ ।वातावरणसँग बोटविरुवाको प्रत्यक्ष सम्वन्ध रहने भएकाले हरेक मानिसले स्वस्थ जीवन जीउँनकालागि खाली ठाउँमा विरुवा रोप्नु पर्ने अति आवश्यक भएको भन्दै कार्यक्रममा सहभागी सवैलाई आयोजक संस्थाको तर्फवाट कागतीका विरुवा वितरण गरिएको थियो । विरुवा वितरण गर्दै सामुदायिक वनका अध्यक्ष ख्याम ओलीले विषादीका कारण दिनप्रतिदिन हावा, पानी र माटो एकैसाथ दुषित बन्दै गएकाले वृक्षरोपणले यसको न्युनीकरणमा थप सहयोग पुग्ने वताएका छन् ।
वातावरण दुषित भएकै कारण हरेक दिन शारिरीक र मानसिक रुपमा अस्वस्थ बन्दै गएको मानव समुदायमा अब वृक्षरोपणको विकल्प नभएको संस्थाका अध्यक्ष ओलीले जोड दिएका छन् ।कार्यक्रमकै अवसरमा डिभिजन वन कार्यालय झापाका पुर्वेली कलाकार संघको प्रस्तुतीमा कसम खबासको निर्देशन रहेको सामुदायिक वनसँग सम्वन्धित चेतनामूलक बृत्त चित्र प्रदर्शन गरिएको थियो । वृत्तचित्रमा वन संरक्षण, गरिवी निवारण र बाढी पहिरो कसरी नियन्त्रण गर्न सकिन्छ भन्ने विषयलाई जोड दिन खोजेको संस्थाका सल्लाहकार भीष्म मैनालीले वताएका छन् ।
कनकाई सामुदायिक वनका अध्यक्ष ओलीको सभापतित्व एवम् कनकाई सव डिभिजन वन कार्यालय सुरुङ्गाका प्रमुख भोलाप्रसाद चौधरीको प्रमुख आतिथ्य साथै डिभिजन वन कार्यालय झापाका सहायक वन अधिकृत नथुनीगोहीवर यादवको विशेष उपस्थिती रहेको कार्यक्रममा स्थानीय उपभोक्ता सहित विभिन्न सामाजिक संघसंस्थाका प्रमुख तथा प्रतिनिधीहरुको सहभागिता रहेको थियो । संस्थाका उपाध्यक्ष ललितवहादुर कार्कीले स्वागत गरेको कार्यक्रमको संचालन सचिव मान्ता खरेलले गरेकी थिइन् ।
