कनकाई खबर \ झापाको कनकाई–४ स्थित जेष्ठ नागरिक संघको संयोजकमा गोविन्द पौडेल सर्वसम्मत रुपमा चयन भएका छन् ।
पुर्व जनप्रतिनिधि समेत रहेका कनकाई–४ का पुर्व वडाअध्यक्ष पौडेलले सेवाको भावनाबाट प्रेरित हुँदै वडामा भएका जेष्ठ मातापिताको हितमा काम गर्ने उद्येश्य लिएको बताएका छन् । वडास्थित जेष्ठ नागरिक भवनमा सम्पन्न संघको प्रथम वडाअधिवेशनबाट अध्यक्षमा सर्वसम्मत रुपमा चयन भएका पौडेलले आगामी दिनमा जेष्ठ नागरिकको हकहितकालागि वडामा जेष्ठ नागरिक चौतारीको थप व्यवस्थापन गर्न पहल गर्ने जनाएका छन् ।
संघको सह संयोजकमा लक्ष्मीप्रसाद पाठक, सचिवमा टेकबहादुर बस्नेत, सहसचिवमा अभिनारायण धमला र कोषाध्यक्षमा कमला सुवेदी चयन भएका छन् । संघको सदस्यहरुमा क्रमशः तुलसीराम भेट्वाल, अम्बरबहादुर कोइराला, गीता सुजी र कृष्णमाया भण्डारी चयन भएका छन् । अन्य दुईजना सदस्य समितिको पहिलो बैठकले मनोनित गरी ११ सदस्यीय वडासमिति निर्माण गर्ने योजना रहेको नवनिर्वाचित संयोजक पौडेलले जानकारी दिए । कार्यसमिति सर्वसम्मत रुपमा चयन गर्न जेष्ठ नागरिक संघ कनकाईका उपाध्यक्ष गोपाल चुडालको संयोजकत्वमा देवीमाया दहाल र शेषप्रसाद प्रसाई सदस्य रहेको निर्वाचन मण्डलले भूमिका खेलेको थियो ।
जेष्ठ नागरिक संघ कनकाई–४ का संयोजक विनोद शर्मा दहालको अध्यक्षता एवं कनकाई नगरपालिकाका प्रमुख राजेन्द्रकुमार पोखरेलको प्रमुख आतिथ्य रहेको कार्यक्रममा संयोजक दहालले वडामा जेष्ठ नागरिक संघले खेलेको भूमिकाको बारेमा तयार पारिएको प्रगति प्रतिवेदन प्रस्तुत गरेका थिए । जेष्ठ नागरिकलाई वृद्धाश्रम होइन, माया सदभाव र आफ्नै सुरक्षित आश्रय स्थल चाहिन्छ भन्ने कुरालाई जोड दिँदै संघका वडा संयोजक दहालले जेष्ठ सदस्यलाई दुःख बिसाउँने चौतारीको आवश्यक हुने बताए । जेष्ठ नागरिक ज्यँदो इतिहास भएको कुरा व्यक्त गर्दै समाज रुपान्तरण र पुष्ता हस्तान्तरणमा जेष्ठ नागरिकको अहम भुमिका रहने प्रतिवेदन मार्फत जानकारी गराइएको छ ।
संघको वडा समितिका उपाध्यक्ष बलराम सुवेदीले स्वागत गरेको कार्यक्रममा प्रमुख अतिथी कनकाई नगर प्रमुख राजेन्द्रकुमार पोखरेल, जेष्ठ नागरिक संघ कनकाईका अध्यक्ष पुण्यप्रसाद बाह्रकोटी, संघका नगर सचिव शम्भुप्रसाद पोखरेल, राजनीतिक दलका तर्फबाट घनश्याम पौडेल, संघको वडा नं.९ का संयोजक धनपति मैनाली लगायतले शुभकामना मन्तव्य राखेका थिए । कार्यक्रमको संचालन संघको वडासचिव डम्बरप्रसाद फुयालले गरेका थिए ।
ेे
