कनकाई खबर \ झापाको कनकाईमा प्रजातन्त्रका सेनानी तुर्षा हेमरमको २६औं स्मृति सभा विविध कार्यक्रमका साथ सम्पन्न भएको छ ।
कनकाई–१ स्थित नगरपालिकाको कार्यालयसँगै निर्माणाधीन अवस्थामा रहेको तुर्सा हेमरम स्मृति प्रतिष्ठान परिसरमा स्मृति सभाको आयोजना गरी उनको राजनीतिक योगदान र जीवनीकाबारेमा चर्चा गरिएको थियो । सभालाई सम्बोधन गर्दै कार्यक्रमका प्रमुख अतिथी समेत रहेका नेपाली कांग्रेसका उपसभापति सांसद धनराज गुरुङले प्रजातन्त्र प्राप्तीको आन्दोलनमा स्वर्गीय तुर्षा हेमरमले पुरयाएको योगदानको प्रशंसा गरे ।
हेमरमले केवल सन्थाल समुदायको लागि मात्र नभएर सबै समुदाय र क्षेत्रका जनताको उन्नती र प्रगतीकालागि उठाएको आवाज र बिचार अहिले पनि नेपाली कांग्रेसकालागि महत्वपूर्ण सम्पति भएको सांसद गुरुङले टिप्पणी गरे । हेमरमको बिचार, कर्म र विश्वासमा अडिएको निष्ठालाई स्थापित गर्न सके मात्र उनीप्रति सच्चा सम्मान हुने भन्दै सांसद गुरुङले झापाका पूर्व उपसभापति समेत रहेका हेमरम वी.पी.का अन्त्यन्तै विश्वास पात्र मध्येका एक भएको बताए ।
वर्तमान देशको राजनीतिप्रति कटाक्ष गर्दै कांग्रेस नेता गुरुङले राजनीति गर्नेहरुकालागि स्व.हेमरम एउटा भरपर्दो शिक्षा साथै आदर्श भएको बताए । पदमा पुगेका नेताहरुले आफ्नो कद घटाउँदै गएकोमा दुःखी बनेका नेता गुरुङले आदर्श पुरुष तुर्षा हेमरमको जीवनीबाट राजनीति गर्ने नेताहरुले सिको गर्नु पर्नेमा जोड दिए ।
प्रतिष्ठानका उपाध्यक्ष लखन हेमरमको अध्यक्षतामा भएको कार्यक्रममा नेपाली कांग्रेस प्रदेश नं. १ का सभापति एवं प्रदेश सभा सदस्य उद्धव थापा, प्रदेश सभा सदस्य लखी गणेश, केन्द्रिय सदस्य सुशिला ढकाल, कांग्रेसका झापा सभापति देउकुमार थेबे, पूर्व सांसद तथा कांग्रेसका अग्रज नेता डिल्ली सिटौला, कनकाई नगरपालिकाका प्रमुख राजेन्द्रकुमार पोखरेल, संबिधानसभा सदस्य सुधिरकुमार शिवाकोटी र विश्वदीप लिङ्देन, लगायतले सन्थाल समुदायमा जन्मिएर हुर्केका हेमरमले वी.पी.र समाजवादी चिन्तक सि.के.प्रसाईका अत्यन्तै निकट रहेर राजनीति गरेको स्मरण गर्दै उनी प्रजातन्त्रका सच्चा सेनानी रहेको बताए ।
कार्यक्रममा तीर, धनुष काँड सहित विभिन्न खेल तथा सन्थाल जातीको भेषभुषामा सजिएका कलाकारहरुले सांस्कृतिक नृत्य समेत प्रस्तुत गरेका थिए । सोही अवसरमा पुराना गायक खड्ग रायमाझीको स्वर,संगीत र रचना रहेको ‘हेरन शहिदहरुलाई…’ बोलको गीत गायक खड्ग र सन्तोष रायमाझीले सभा हलमा प्रस्तुत गर्दा सहभागीहरुमा सन्नाटा छाएको थियो ।
प्रतिष्ठानकी उपाध्यक्ष टिका मैनालीले स्वागत गरेको औपचारिक कार्यक्रमको सञ्चालन प्रतिष्ठानका सचिव कुमारमणि पोखरेलले गरेका थिए ।
