कनकाई खबर \ झापाको कनकाई स्थित पुर्वकै लोकप्रीय पर्यटकीय क्षेत्र निर्माणाधिन जामुनखाडी प्राकृतिक रंगशालामा संचालन भएको हर्क राई स्मृति नकआउट फुटबल प्रतियोगिताको उपाधि जलथल एफसिले चुमेको छ ।
शनिवार सम्पन्न फाईनल खेलमा उपाधिका लागि एपिएफ पकली र जलथल एफसि विच प्रतिष्पर्धा भएको हो । निर्धारित समय अवधि सम्ममा दुबैंतर्फबाट दोस्रो हाफमा १ ÷ १ गोलको बराबरी भएपछि खेलको अन्तिम निर्णय ट्राईब्रेकरबाट भएको थियो । ट्राईब्रेकरमा जलथलले ५ र एपीएफ पकलीले ४ गोल मात्र गर्न सफल भएपछि जलथल एफसीले उपाधि चुमेको हो ।
उपाधि विजेताले नगद रु १ लाख ११ हजार सहित ट्रफि, मेडल र प्रमाण पत्र प्राप्त गरे । कार्यक्रमका प्रमुख अतिथि कनकाई नगरपालिकाका प्रमुख राजेन्द्रकुमार पोखरेलले विजेतालाई प्रथम पुरस्कार हस्तान्तरण गरे भने उपविजेता एपीएफलाई राई परिवारका सदस्य दिलिप राईबाट नगद रु. ५५ हजार सहित ट्रफि, मेडल र प्रमाण पत्र हस्तान्तरण गरियो ।
खेलको म्यान अफ दि म्याच साथैं प्लेयर अफ दि टुर्नामेण्टको उपाधि क्रमशः जलथलका गोलकिपर समिर लिम्बू र हर्क लिम्बूले प्राप्त गरे । स्वर्गीय हर्क राईकी श्रीमतिले दुवैजना खेलाडीलाई नगद , ट्रफी र प्रमाण पत्र प्रदान गरिन् । यसैगरी सर्वाधिक गोलकर्ताको पुरस्कार एफिएफ पकलीका जर्सी नम्बर—४ का अरविन्द चौधरीले नगद रु. ११ हजार १ सय ११ प्राप्त गर्न सफल भए । कार्यक्रमका अवसरमा खेललाई विभिन्न विधामा सहयोग पुर्याउने संघसंस्था र व्यक्तिहरुलाई सम्मान पत्रले सम्मान गरेको कनकाई—२ का वडाअध्यक्ष बलराम राईले जानकारी दिए ।
गत पौंष २ गते उद्घाटन भएको खेलमा झापा,मोरङ् र सुनसरीका लोकप्रिय ८ वटा टिमको प्रतिष्पर्धा रहेको बताइएको छ । निरन्तर खेलकुद आयोजना गरि थप पर्यटक भित्र्याउनु रंगशाला निर्माणको मुख्य उद्येश्य रहेको आयोजक जामुनबारी सामुदायिक बन उपभोक्ता समूह एवं जामुनखाडी सिमसार तथा पर्यटकीय क्षेत्रका अध्यक्ष ख्यामराज सिटौंलाले बताए ।
जामुनखाडी पूर्वकैं फेवाताल जस्तैं उपमा पाएको पर्यटकीय क्षेत्र भएकाले यस प्रस्तावित रंगशाला र यसमा सञ्चालन भएको खेलले पर्यटकहरुलाई थप आकर्षण थपेको कनकाई नगरपालिकाका प्रमुख राजेन्द्रकुमार पोखरेलले बताए । पर्यटकीय क्षेत्र जामुनखाडीमा प्राकृतिक खेल मैदानले नौलो आयाम थपेकोमा खुशी व्यक्त गर्दै नगर प्रमुख पोखरेलले यसको सर्वाङ्गीण विकासका लागि कनकाई नगरपालिकाले समेत सक्दो सहयोग गर्ने प्रतिवद्धता जनाए ।
सबैको साथ सहयोग , एकता र हातेमालोका कारण प्रदेश स्तरीय फुटबल प्रतियोगीता सफलतापूर्वक सम्पन्न भएकोमा खुशी व्यक्त गर्दै खेल संयोजक एवं जामुनखाडी स्पोर्टिङ क्लबका अध्यक्ष गणेश गिरीले सबैलाई धन्यवाद प्रकट गरे । औपचारिक कार्यक्रममा सहभागीहरुलाई जामुनवारी सामुदायिक वन समूहका अध्यक्ष ख्यामराज सिटौलाले शब्दद्वारा स्वागत गरेका थिए । कार्यक्रमको संचालन क्लवका सदस्य विनोद रानाले गरेका थिए भने खेलको टिम व्यवस्थापन शुलभ भण्डारीले गरेको बताइएको छ ।
