कनकाई खबर \ देशकै उत्कृष्ट सहकारीका रुपमा स्थापित झापाको बिर्तामोड–२ स्थित चारपानेमा प्रधान कार्यालय रहेको सहारा नेपाल बचत तथा ऋण सहकारी संस्थाले १ अर्ब ६३ करोड१६ लाख शेयर पुँजी बनाउँन सफल भएको छ ।
संस्थाको २६ औं साधारण सभाको अवसरमा तयार पारिएको प्रतिवेदन पत्रकार सम्मेलन मार्फत सार्वजनिक गर्दै संस्थाका कार्यकारी प्रमुख महेन्द्रकुमार गिरीले २०७९ को असार मसान्त सम्मको वित्तिय अवस्थाका बारेमा जानकारी गराउँदै सहारा साकोस देशकै उत्कृष्ट सहकारी संस्था भएको दाबी गरे । संस्थाको सदस्य,पुँजी तथा सदस्य संरक्षण, समुदायप्रतिको चासो लगायत सम्पुर्ण हिसाबले यस वर्ष मुलुकभरीकै पहिलो र उत्कृष्ट संस्थाको रुपमा सहारा साकोस स्थापित भएको कार्यकारी प्रमुख गिरीले पत्रकार सम्मेलनमा जानकारी गराए ।
विश्व वजारमा परेको आर्थिक मन्दी साथै नेपालका बैंक तथा वित्तिय संस्थाहरुमा तरलता अभाव भैरहेको जटिल परिस्थितीमा पनि संस्थाले सहज रुपमा ऋण लगानी र सदस्यहरुको बचतको पुर्ण सुरक्षा प्रदान गर्दै आएको कार्यकारी प्रमुख गिरीले जानकारी दिए ।
हाल सम्म ७९ वटा सेवा केन्द्रमा १ लाख ५९ हजार ७७८शेयर सदस्य भएको सहारा साकोसले आफ्नो वित्तिय अवस्थालाई अझ मजबुत बनाउँने योजना अनुरुप मिसन २०८८ सम्मको रणनितिक योजना निर्माण गर्दै १ खर्बको वासलात बनाउँने लक्ष्य तय गरेको पत्रकार सम्मेलनमा जानकारी गराइएको छ । संस्थाको जगेडा कोष १ अर्ब ११ करोड ११ लाख, अन्य कोष ४४ करोड ७१ लाख, बचत ९ अर्ब २५ करोड ३६ लाख रुपैयाँको रहेको बताइएको छ ।
त्यस्तै लगानीमा रहिरहेको ऋण १३ अर्ब, भौतिक सम्पत्ती ४१ करोड १६ लाख र बाह्य ऋण १ अर्ब ७२ करोड रहेको पत्रकार सम्मेलनमा सार्वजनिक गरिएको संस्थाको प्रेस विज्ञप्तीमा उल्लेख गरिएको छ । प्रेस विज्ञप्ती सार्वजनिक गर्दै संस्थाका कार्यकारी प्रमुख गिरीले ०७९ असार मसान्तसम्ममा संस्थाको वासलात १५ अर्ब ३८ करोड पुगेको बताए । संस्थाले आर्थिक वर्ष २०७८ \ ०७९ मा ४९ करोड ७७ लाख रुपैयाँ खुद नाफा गरेको जानकारी दिँदै कार्यकारी प्रमुख गिरीले यसबाट सदस्यलाई लाभांश र संरक्षित पुँजी फिर्ता कोषबाट ३० करोड १५ लाख वितरण गर्ने योजना रहेको बताए ।
संस्थाले विगतका सदस्य केन्द्रित कार्यक्रमहरुलाई निरन्तरता दिँदै केही नयाँ थप कार्यक्रमहरु संचालन गर्ने योजना बनाएको छ । जस अन्तर्गत विश्वस्तरमा संजाल निर्माण गर्ने, रोजगार शाखा स्थापना गरी रोजगारी सिर्जनामा पहल, सामाजिक व्यवसाय सञ्चालन र अति विपन्न गरिबलाई माथि ल्याउन पहल जस्ता कार्यक्रम प्रस्ताव गरेको जनाइएको छ ।
संस्थाले यस वर्ष आन्तरिक व्यवस्थापन र गुणस्तरीय सेवालाई मजबुत बनाउने हिसाबले कार्यक्रम अघि सारेको छ । त्यसरी नै संस्थाले प्रविधिमैत्री सेवालाई प्राथमिकता दिँदै एटिएम, ट्याबलेट, मोबाइल एप्स सेवा, क्युआर कोड र एसएमएस बैंकिङ सेवा सञ्चालनमा ल्याइसकेको जनाइएको छ । हाल सम्म अन्य ६ वटा सहकारी संस्था एकीकरण भइसकेको सहारा साकोसले संस्थालाई अझै बलियो बनाउन यस वर्ष पनि एकीकरण प्रक्रियालाई निरन्तरता दिइने बताइएको छ । एकीकरण प्रक्रियाकालागि धेरै संस्थाहरु सम्पर्कमा आएको भए पनि हाल ५ वटा सहकारी संस्था एकीकरणको तयारीमा रहेको सहारा साकोसका कार्यकारी प्रमुख गिरीले जानकारी दिए ।
संस्थाले चालु आर्थिक वर्षभित्र ८९ सेवा केन्द्र, १ लाख ७५ हजार सदस्य र १७ अर्बको वासलात बनाउँदै ६२ करोड नाफा कमाउने प्रक्षेपण गरेको जनाइएको छ ।
संस्थाका अध्यक्ष हरिबहादुर राजवंशीको अध्यक्षतामा भएको कार्यक्रममा संस्थाका संचालकसहित सहारा शिक्षा सदनका२६जना विद्यार्थीहरुबाट प्रतिवेदन सार्वजनिक गरिएको हो । महिला उपाध्यक्ष पवित्रा सुब्बाले स्वागत गरेको कार्यक्रमको संचालन संस्थाका उपनिर्देशक दिनेशबहादुर निरौलाले गरेका थिए ।
