कनकाई खबर \ झापाको विर्तामोड–४ मा प्रधान कार्यालय रहेको कर्णाली बचत तथा ऋण सहकारी संस्था लि.को इकाईस्तरको साधारणसभा अन्तर्गत इकाइ नं.३ को सुरुङ्गामा सम्पन्न भएको छ ।
कनकाई उद्योग वाणिज्य संघको सभा हलमा सुरुङ्गासहित झिलझिले, शिवगन्ज, बैगुनधुरा र शरणामति सेवा केन्द्रको एकै स्थानमा साधारण सभा सम्पन्न भएको हो । सहकारी विभागले गत भदौमा निर्धारण गरी लागू गरेको मापदण्ड अनुसार कर्णाली साकोसको विभिन्न ७ स्थान मध्ये इकाइ नं.३ को सुरुङ्गामा इकाईस्तरको साधारणसभा सम्पन्न भएको हो । संस्थाका अध्यक्ष टसबहादुर प्रधानको अध्यक्षतामा आयोजित एकाई साधारणसभाको उद्घाटन संस्थाका दुईजना ज्येष्ठ सदस्यहरुको हातबाट दिप प्रज्वलन मार्फत गरिएको हो । इकाई साधारणसभामा संस्थाका अध्यक्ष प्रधानले वार्षिक प्रतिवेतन प्रस्तुत गरेका थिए ।
अध्यक्ष प्रधानले प्रस्तुत गरेको प्रतिवेदनमा गत आर्थिक वर्ष २०७८ \ ०७९ को असार मसान्तसम्ममा संस्थाको शेयर पूँजी ४३ करोड ७४ लाख ४ हजार १०० रुपैयाँ, बचत मौज्दात १ अर्व ८७ करोड २६ लाख ८३ हजार ९३० रुपैयाँ, लगानीमा रहेको ३ अर्व ४६ करोड ७९ लाख ४० हजार १२३ रुपैयाँ र जगेडा कोषमा १० करोड ७८ लाख ८८ हजार ४०२ रुपैयाँ रहेको उल्लेख छ ।
त्यस्तै संस्थाको स्थिर सम्पत्ति १२ करोड ७५ लाख १३ हजार ११३ रुपैयाँ रहेको छ भने गत आर्थिक वर्षमा संस्थाले १० करोड ७ लाख ४८ हजार ४२० रुपैयाँ नाफा गर्न सफल भएको छ । ५० हजार ६८४ जना शेयर सदस्य र ३४ वटा संस्थाहरु आवद्ध रहेको कर्णाली साकोसले ३ अर्ब ४६ करोड ७९ लाख ४० हजार रुपैयाँ सदस्य माझ कर्जा लगानी गरेको जनाइएको छ । एकाईगत साधारणसभामा लेखा सुपरीवेक्षण समितिको प्रतिवेदन लेखा समिति सदस्य मनकुमार बेघाले वाचन गरेका थिए ।
यसैगरी संस्थाको चालू वर्षका लागि निर्धारण गरिएको वार्षिक नीति तथा कार्यक्रम एवम् बजेट कोषाध्यक्ष एकराज विष्टले प्रस्तुत गरेका थिए । संस्थाले चालू वर्षका लागि २४ वटा कार्यक्रम बनाएको छ भने शेयर रकम ५९ करोड १८ लाख ५० हजार पुर्याउने लक्ष्य राखेको छ । यस्तै जगेडा कोषमा १० करोड ७६ लाख, कर्जा जोखिम ब्यवस्था कोषमा ६ करोड ३७ लाख ५० हजार, अन्य कोष तथा दायित्व २१ करोड ६९ लाख ८७ हजार र निक्षेप २ अर्ब ६७ करोड २५ लाख ३७ हजार पुर्याउने लक्ष्य प्रस्तुत गरे ।
सुरुङ्गा सेवा केन्द्र व्यवस्थापन समितिका संयोजक चन्द्रप्रसाद भेट्वालले आमन्त्रितहरुलाई स्वागत गरेको इकाई साधारणसभाको सञ्चालन संस्थाका सचिव भूपाल बस्नेतले गरेका थिए । कार्यक्रममा सहभागी सदस्यहरुबाट आएको प्रस्ताव अनुसार संस्थाले सदस्यहरुलाई प्रदान गर्दै आएको विशेष उपचार कोष तर्फको रु.५हजार संस्थाले नै लगानी गरिदिने साथै सदस्यहरुले क्रमिक रुपले तिर्दै जाने भन्ने प्रस्तावलाई टिपोट गरिएको छ । सो कार्यक्रमबाट पुष २४ गतेका लागि निर्धारित अन्तिम माइन्युट प्रमाणित साधारण सभामा प्रतिनिधित्व गर्ने तीनजना सेयर सदस्यहरुको चयन गरिएको सुरुङ्गा सेवा केन्द्रका प्रमुख ईन्द्रवहादुर कार्कीले जानकारी दिए ।
