कनकाई खबर \ झापा र मोरङमा उपेक्षित तथा उष्णप्रदेशीय रोग मातृशिशु स्याहार र अपाङ्गता भएका व्यक्तिको स्वास्थ्य सुधार गर्न सहारा नेपाल र फेयरमेड फाउण्डेशनको साझेदारीमा विश्वास परियोजनाले कार्य गर्दै आएको छ । परियोजना अन्तरगत नेपालमा पाइएका उपेक्षित उष्णप्रदेशिक १० वटा रोगबाट समुदायको स्वास्थ्यमा सुधार गर्ने कार्यक्रम गरिदै आएको हो ।
सहारा नेपालको आयोजना र फेयरमेड फाउण्डेशनको सहयोगमा शनिवार(आज) चारपानेस्थित सहारा नेपालको केन्द्रिय कार्यालयमा पत्रकारहरुसँग अन्तक्रिया गर्दै कार्यक्रमका बिषयमा जानकारी गराइएको हो । सहारा नेपाल र फेयरमेडले एक बर्ष अघिदेखि साझेदारी गरेर कार्य गर्दै आएको अन्तरक्रिया कार्यक्रममा जनाइएको छ ।
सहारा नेपाल र फेयरमेड फाउण्डेशनको साझेदारीमा मोरङ र झापाका १७ वटा पालिकामा उपेक्षित उष्णप्रदेशिक १० वटा रोग प्रदेश १ का लक्षित नगरपालिका र गाउँपालिकामा कसैलाई पछि नछोडी समुदायको स्वास्थ्यमा सुधार गरिने सहारा नेपालका सचिव महेन्द्रकुमार गिरीले जानकारी दिए । गिरीका अनुसार कुष्ठरोग, हात्तीपाइले, जुकाहरु, डेङ्गु र चिकनगुनिया, कालाजार, सर्पदंश, रेबिज, लुतो, फित्ते जुका र खस्रेरोगबाट लक्षित बर्गलाई उपेक्षित उष्णप्रदेशीय रोग, मातृशिशु स्वास्थ्य, अपाङ्गता र उपेक्षाका बारेमा जनचेतना जगाइनेछ ।
झापाका १५ पालिका मध्ये कचनाकवल, झापा, बाहदशी, हल्दिबारी, गौरीगञ्ज गाउँपालिका, भद्रपुर, बिर्तामोड, कनकाई, गौरादह र मेचीनगर गरेर १० वटा पालिकामा केन्द्रित रहेर कार्यक्रम सञ्चालन गरिने कार्यक्रमका फोकल पर्सन मात्रिका सुवेदीले जानकारी दिए ।
स्वास्थ्य सेवा प्रवाह गर्ने स्वास्थ्यकर्मी र सम्बन्धित निकायको ब्यवस्थापकीय क्षमता सुद्धिकरण गरी एकीकृत, समतामुलक र पारदर्शी स्वास्थ्य सेवा बिस्तार, सामुदायिक स्वास्थ्य सेवालाई एकीकृत र गुणस्तरीय बनाउने र समुदायका ब्यक्तिहरुको क्षमताबृद्धि गरी स्वास्थ्य सेवामा पहुँच बढाउने उदेश्यका झापा र मोरङका १७ वटा पालिकामा कार्यक्रम सञ्चालन गरिएको फेयरमेड फाउण्डेशनका अनुगमन तथा कार्यक्रम बिशेषज्ञ बेदप्रकाश शर्माले जानकारी दिए ।
उपेक्षित उष्णप्रदेशीय रोग विशेषगरी गरिबीको रेखामुनी रहेका मानिसहरुमा बढी पाइने विश्वास परियोजनाका संयोजक पवनकुमार राईले जानकारी दिए । झापा, मोरङ र सुनसरीमा सञ्चालित चार बर्षे विश्वास परियोजनाले सबै रोगीहरुको पहिचान गरी उपचारमा सहयोग पुर्याउने लक्ष्य लिइएको जनाइएको छ ।
कार्यक्रम सहारा नेपालका अध्यक्ष भरतकुमार गिरी, नेपाल पत्रकार महासंघ झापाका अध्यक्ष एकराज गिरीलगायतले आ–आफ्नो भनाई प्रस्तुत गरेका थिए । कार्यक्रममा सहारा नेपालका ध्यानबहादुर भारती, किशोर गिरीलगायतको उपस्थिति रहेको थियो ।
