कनकाई खबर \ झापाको सुरुङ्गामा ‘बिग सिफ्ट सेमिनार’ नामक मोटिभेसनल सेमिनार संचालन हुने भएको छ ।
‘लाइफ कोच’ का रूपमा परिचित नेपालकै चर्चीत मोटिभेसनल स्पिकर सौनक भट्टको विशेष प्रस्तुती रहने सेमिनारमा कक्षा ८ देखि १२ सम्मका ५सय बढी विद्यार्थी लाभान्वीत हुने बताइएको छ । सकारात्मक सोचका साथ समाज रुपान्तरणमा सधैं क्रियाशिल रोटरी क्लव अफ सुरुङ्गाको भातृ संस्था रोट्रयाक्ट क्लव अफ सुरुङ्गा एवं आई.वाई.डाईनामिकको संयुक्त आयोजनामा यहि मंसिर २८ गतेका दिन कनकाई उद्योग वाणिज्य संघको सभा हलमा सेमिनार संचालन हुने कार्यक्रम संयोजक रोट्रयाक्ट दिपेश तिवारी(दिवाकर)ले बताए । आयोजक संस्थाले आज(बुधबार)सुरुङ्गामा पत्रकार सम्मेलनको आयोजना गरी मोटिभेसनल सेमिनारको बारेमा जानकारी गराएको हो ।
हजारौं व्यक्तिलाई उत्प्रेरणा प्रदान गरिसकेका सौनकको सेमिनारमा किशोरावस्थामा प्रवेश गर्न लागेका युवादेखि सेवा निवृत्त हुने उमेरसम्मका व्यक्तिहरु लाभान्वीत हुने गरेको बताइएको छ । विशेष गरी युवालाई आवश्यक पर्ने खुराक युवाबाटै प्राप्त हुने भएकाले सुरुङ्गामाभट्टलाई ल्याउँने निर्णय गरेको रोट्रयाक्ट क्लवका उपाध्यक्ष प्रतापबाबु जमरकट्टेलले जानकारी दिए । सेमिनारकालागि कनकाई नगरपालिका, झापा गाउँपालिका, कनकाईको वडा नं.१, ३ र वडा नं.४, सिटिजन लाइफ इन्सोरेन्स, कंगारो एजुकेशन फाउण्डेशन, कारितास नेपाल लगायत एक दर्जन बढी संघसंस्थाले आर्थिक सहयोग गर्ने निर्णय भएको रोट्रयाक्ट कट्टेलले बताए ।
रोट्रयाक्ट क्लव अफ सुरुङ्गाका अध्यक्ष रोशन शाहको अध्यक्षता एवं आई.वाई.डाईनामिकका अध्यक्ष अभिशेक मिश्रले सहजीकरण गरेको पत्रकार सम्मेलनमा रोटरी क्लव अफ सुरुङ्गाका अध्यक्ष खेम प्रसाईँले मनमस्तिष्कमा सकारात्मक सोचको भावना जागृत गर्दै समाज रुपान्तरणकालागि मोटिभेसनल सेमिनार कोसेढुङ्गा सावित बनोस् भन्दै कार्यक्रमको पुर्ण सफलताको कामना गरे । रोट्रयाक्ट क्लवकी सचिव सारिका गिरीले कार्यक्रममा सहभागी सबैलाई धन्यवाद ज्ञापन गरेकी थिइन् ।
