कनकाई खबर \ सिभिल बैंकले १२ औं बार्षिक उत्सवको अवसर पारेर देशभरीका शाखामा विभिन्न कार्यक्रम गरी उत्सव मनाएको छ ।
यसै क्रममा बैंकको शाखा सुरुङ्गाले समेत संस्थाको सामाजिक उत्तरदायित्व अन्तर्गत रहेर बार्षिक उत्सवलाई थप विशेष बनाएको छ । सर्वप्रथम बैंकको सुरुङ्गा शाखा परिसरमा एक संक्षिप्त कार्यक्रमका विच शुभकामना आदानप्रदान सम्पन्न भएको छ । वार्षिक उत्सवका अवसरमा शाखा प्रमुख प्रकाश निरौलाले स्थानीय कनकाई–३ का वडाअध्यक्ष युवराज चम्लागाईको प्रमुख आतिथ्य रहेको संक्षिप्त कार्यक्रममा उपस्थित सबैलाई केक काटेर वितरण गरेका थिए । सोही अवसरमा उद्योग बाणिज्य महासंघ प्रदेश कमिटीका सदस्य कुमारमणि पोखरेल, कनकाई उद्योग वाणिज्य संघका अध्यक्ष तुलसी बिमली, युनीक बहुमुखी क्याम्पस सुरुङ्गाका प्रमुख दिपक भट्टराई, कनकाई छठसेवा समाजका कोषाध्यक्ष दिनेश ठाकुर, स्थानीय व्यवसायी, संचारकर्मी लगायतको उपस्थिति रहेको शाखाका कर्मचारी प्रवेश भेट्वालले जानकारी दिए ।
बार्षिक उत्सवकै अवसरमा सिभिल बैंक शाखा सुरुङ्गाले झापा गाउँपालिका–६ स्थित जनता माविको कक्षा १०मा अध्ययनरत गरिव तथा जेहेन्दार एकजना छात्रा भुमिकाकुमारी गणेशलाई छात्रवृत्ति प्रदान गरेको शाखा प्रमुख निरौलाले बताए ।
चार वर्ष अघि मात्र २०७६ को जेठमा सुरुङ्गामा शाखा विस्तार गरेको सिभिल बैंकले वित्तिय कारोबारमा मात्र सिमित नभई सामाजिक क्षेत्रमा समेत विभिन्न गतिविधि संचालन गर्दै आएको छ । यसै क्रममा बैंकले सामाजिक उत्तरदायित्व अन्तर्गत नै रहेर स्थानीय सुरुङ्गा खानेपानी तथा सरसफाई उपभोक्ता समूहलाई ५० थान प्लाष्टिकका कुर्सी वितरण गरेको छ ।
सुरुङ्गा खानेपानी संस्थाको कार्यालय परिसरमा एक विशेष कार्यक्रमका विच बैंकका तर्फबाट प्रदेश नं.१ का प्रमुख राजेश ढकालले संस्थाका अध्यक्ष भीमप्रसाद अधिकारीलाई कुर्सी हस्तान्तरण गरेका हुन् । सोही अवसरमा सिभिल बैंक प्रदेश नं.१ का वरिष्ठ अधिकृत विकास कोइराला, सुरुङ्गा शाखा प्रमुख प्रकाश निरौला, कर्मचारी रीमा राईसहित खानेपानीका कोषाध्यक्ष रामवहादुर न्यौपाने, सुरक्षा समिति सदस्य निर्मलकुमार खतिवडा, मैना तिवारी लगायतको उपस्थिती रहेको सुरुङ्गा खानेपानी संस्थाका कार्यालय सचिव नारायण नेपालले बताए । सिभिल बैंकले प्रदान गरेको कुर्सी ग्रहण गर्दै खानेपानी संस्थाका अध्यक्ष भिमप्रसाद अधिकारीले संस्थाको तर्फबाट बैंकप्रति आभार प्रकट गरे ।
