१२ मंसिर, झापा । झापा ४ बाट नवनिर्वाचित सांसद एलपी साँवा लिम्बुले संविधानमा उल्लेखित विषयहरुबारे अझै जनतालाई सुसूचित गराउन नसकिएको बताएका छन् । त्यसैले संविधानमा भएका विषयहरुबारे सबैलाई जानकारी गराउनु आफ्नो पहिलो काम हुने उनले बताए ।
उनले तीन तहको सरकार, सांसद लगायतको काम र अधिकार क्षेत्रबारे सबैलाई पर्याप्त जानकारी नभएको बताउँदै यसबारे बुझाउनुपर्ने जिकिर गरेका हुन् । निर्वाचित उम्मेदवारहरुलाई प्रमाण पत्र वितरण गर्ने कार्यक्रममा बोल्दै उनले मतदातालाई ऐन, कानून मात्र बनाउँछु भनेर मत पाउन नसकिने बताए ।
दिदीबहिनीले माला लगाइदिसक्नु भएको हुँदैन, धुलो बाटो देखाएर यो बनाइहाल भन्नुहुन्छ । सांसदको कामबारे सबैलाई बुझाउनु अहिलेको चुनौति हो ।
एलपी साँवा, नवनिर्वाचित सांसद, झापा ४
उनले प्रश्न गरेका छन्, ‘निर्वाचन प्रक्रियामा सहभागी हुँदा म ऐन, कानून मात्र बनाउँछु भनेर उठ्ने सांसदले जित्छ त जित्दैन ?’ त्यसरी चुनावमा होमिने सांसदले नजित्ने बताउँदै उनले अगाडि भने, ‘यो खोला नियन्त्रण गर्छु भन्नुपर्यो । बाटो छ, धुलो उडिरहेको छ । म कालोपत्रे गर्छु भन्नुपर्यो । स्कुलको हालत छ, बनाउँछु भन्नु पर्यो ।’
त्यो भन्नुपर्ने विषय थियो कि थिएन भन्ने अर्को पाटो भएको बताउँदै उनले भने, ‘हिजो माला लगाउँदा दिदी बहिनी उत्साहित हुनुहुन्छ । तर, माला लगाइसकेको छैन, धुलो बाटो बनाइहाल भन्नुहुन्छ, यो चुनौति हो ।’
हेर्नुस् भिडियो