कनकाई \ झापाको कनकाईमा भएको मदिरा व्यवसायीहरुको एक भेलाले सरकारले आँफूहरुलाई हेर्ने दृष्टिकोण सकारात्मक नभएको भन्दै सरकारको ध्यानआकर्षण गराएका छन् ।
राज्यलाई राजस्व बुझाउँने व्यवसायीहरु मध्येको तेस्रो स्थानमा रहेको मदिरा व्यवसायको संरक्षण र प्रवद्र्धनकालागि उत्साह जगाउँदै राज्यले अभिभावकको भूमिका निर्वाह गर्नु पर्ने तर्फ व्यवसायीहरुले जोड दिएका छन् । झापाको कनकाई नगरपालिका र झापा गाउँपालिकाभित्र रहेर मदिरा व्यवसाय संचालन गरिरहेका व्यवसायीहरुको संस्था कनकाई मदिरा व्यवसायी संघले आयोजना गरेको अन्तरक्रियामूलक कार्यक्रममा सहभागी भएका मदिरा व्यवसायीहरुले यस्तो धारणा राखेका हुन् ।
कार्यक्रममा संघका नगर अध्यक्ष गोपाल चुडालले मदिरा व्यवसायीप्रति राज्यको गलत नीति भएकै कारण व्यवसायीहरु असुरक्षित बन्दै गएको आरोप लगाउँनुभएको छ । ग्रामीण क्षेत्रमा अव्यवस्थित रुपमा घरेलु मदिरा विक्रिवितरण गरीरहेका व्यवसायीहरुलाई सरकारले व्यवस्थित गर्नु पर्ने तर्फ जोड दिँदै व्यवसायी चुडालले दर्ता बेगर संचालन भएका मदिराजन्य व्यवसायको पहिचान गरेर कानुनी दायराभित्र ल्याउँन माग गर्नुभएको छ । संघका झापा जिल्ला उपाध्यक्ष गोकुल होमगाईँले मदिरा व्यवसायीहरुले आन्तरिक राजस्व कार्यालयवाट विधिवत रुपमा दर्ता भएर व्यवसाय संचालन गर्न सम्पूर्ण मदिरा व्यवसायीहरुलाई अनुरोध गर्नुभएको छ ।
स्थानीय सरकारका तर्फवाट कनकाई नगरपालिकाका प्रमुख राजेन्द्रकुमार पोखरेलले मदिरा व्यवसायीहरुको अवस्था पहिचान गरेर व्यवसायलाई व्यवस्थित गर्ने कार्यमा राज्य सधैं सकारात्मक रहेको जानकारी दिनुभएको छ । अव्यवस्थित रुपमा संचालनमा आएका मदिराजन्य व्यवसायलाई वैकल्पिक रोजगारमुखी कार्यक्रम बनाएर त्यस्ता मदिराजन्य व्यवसायलाई न्युनीकरण गर्दै जाने सरकारको नीति रहेको नगर प्रमुख पोखरेलले प्रष्ट पार्नुभएको छ ।
