कनकाई खबर \ झापाको कनकाईमा संचालन भएको एनएमसी जामुनखाडी सिमसार कप १ नं.प्रदेशस्तरीय पुरुष नकआउट भलिबल प्रतियोगिताको उपाधि सुनसरीले हात पारेको छ ।
सुरुङ्गा जेसीज र कनकाई नगर खेलकुद समितिको संयुक्त आयोजना तथा रोटरी क्लव अफ सुरुङ्गा सहआयोजक रहेको प्रतियोगिता पूर्वकै प्रसिद्ध पर्यटकीय क्षेत्र कनकाईस्थित जामुनखाडी सिमसार तथा पर्यटकीय क्षेत्रमा मंगलवारदेखि संचालन भएको थियो ।
सुनसरी र सोलूखुम्वु विच शुक्रवार भएको फाइनल खेलमा सोलूका विरुद्ध तीन सेटले अग्रता लिँदै सुनसरी विजेता बनेको हो । प्रतियोगिताको पहिलो सेटमा २५\१९ ले सोलूले अग्रता लिएको थियो भने अरु तीन सेट लगातार सोलूलाई पछि पार्दै सुनसरी विजेता घोषित भएको हो । सुुनसरीले २५\१९, २५/२३ र २७\२५ को सेटले सोलूलाई पछि पार्दै प्रदेशस्तरीय भलिबल प्रतियोगिताको उपाधि हात पारेको हो । विजेता भएसँगै सुनसरीले प्रथम पुरस्कार १ लाख १ हजार १ सय ११सहित मेडल र प्रमाण पत्र प्राप्त गरेको छ । प्रतियोगिताको दोस्रो हुन सफल सोलूखुम्बुले नगद पुरस्कार ५१ हजार १ सय ११ मा चित्त बुझाएको थियो । प्रतियोगिताको दुवैवटा पुरस्कार कनकाई नगरका प्रमुख राजेन्द्र पोखरेल र नेपाल बहुउद्येश्यीय सहकारी संस्था लि.का अध्यक्ष रामचन्द्र उप्रेतीले संयुक्त रुपमा हस्तान्तरण गरेका थिए । 
खेलको म्यान अफ द म्याच सोलुका खेलाडी सञ्जय बस्नेत घोषित भएका छन् । उनलाई एनआईसी एसीया बैंकले प्रायोजन गरेको नगद एक हजार सहित ट्रफी प्रदान गरिएको वताइएको छ । प्रतियोगिताको विभिन्न सातवटा विधामा उत्कृष्ट हुने खेलाडीहरुलाई जनही नगद रु.५ हजारसहित ट्रफी प्रदान गरिएको आयोजक समिति सुरुङ्गा जेसीजका अध्यक्ष कमल कट्टेलले वताएका छन् । जसअनुसार वेष्ट डिफेन्डरमा सुनसरीका बसन्त राई, वेष्ट स्पाइकरमा सोलुका विमान खड्का, बेष्ट सटरमा झापाका रोनिश राई र वेष्ट व्लकरमा सुनसरीका सुरज चौधरी घोषित भएका थिए ।
त्यस्तै वेष्ट सरभर सोलुका विजयराना मगर, उत्कृष्ट अनुशासित खेलाडीमा झापा भलिबलका भरत यादव र प्रतियोगिताकै सर्वोत्कृष्ट खेलाडीमा म्यान अफद म्याच विजेता सोलूका खेलाडी सञ्जय बस्नेत घोषित भए । उनलाई जामुनखाडी सामुदायिक वन समुहका अध्यक्ष ख्यामराज सिटौलाले नगद १० हजार सहित ट्रफी र प्रमाण पत्र प्रदान गरेको खेल संयोजक केशव शिवाकोटीले जनाएका छन् ।
पर्यटन भ्रमण वर्ष २०२० लाई सफल बनाउँदै प्रदेशस्तरीय पर्यटन प्रवद्र्धन गर्ने उद्येश्यले मंगलवारदेखि संचालन भएको प्रतियोगितामा १ नं. प्रदेशका ११ जिल्लासहित आयोजक सुरुङ्गा जेसीज समेत गरी १२ वटा टिमको सहभागिता रहेको वताइएको छ । प्रतियोगितामा झापा लगायत मोरङ, सुनसरी, इलाम, ताप्लेजुङ्, संखुवासभा, तेह्रथुम, भोजपुर, सोलुखुम्बु, उदयपुर, धनकुटावाट खेलाडीहरुको सहभागिता रहेको थियो ।
प्रतियोगिता सम्पन्न गर्नकालागि कनकाई नगरपालिकावाट रु.२ लाख ५० हजार, नेपाल बहुउद्येश्यीय सहकारी संस्था लि. वाट रु.२ लाख ५० हजार र जामुनवारी सामुदायिक वनवाट रु.२ लाख ५० हजार आर्थिक सहयोग प्राप्त भएको थियो भने अन्य विभिन्न संघसंस्था र खेलप्रेमी महानुभावहरुवाट सहयोग प्राप्त भएको आयोजक कनकाई नगर खेलकुद समितिका सदस्य जविन तिम्सिनाले वताएका छन् ।
आन्तरिक तथा बाह्य पर्यटन प्रवद्र्धनकालागि खेलकुदलाई पर्यटनसँग जोड्दै अघि बढ्नु पर्नेमा पूर्वकै चर्चित पर्यटकीय क्षेत्र जामुनखाडी सिमसारका अध्यक्ष ख्यामराज सिटौलाले जोड दिएका छन् ।
सुरुङ्गा जेसीज वर्ष २०१९ का अध्यक्ष कमल कट्टेलको सभापतित्व एवम् प्रदेश सभा सदस्य हिराकुमार थापाको प्रमुख आतिथ्य रहेको प्रतियोगिताको समापन कार्यक्रममा कनकाई नगरपालिकाका प्रमुख राजेन्द्रकुमार पोखरेल, नेपाल बहुउद्येश्यीय सहकारी संस्था लि.का अध्यक्ष रामचन्द्र उप्रेती, कनकाई नगर वडा नं.२ का अध्यक्ष परशुराम गिरी, सुरुङ्गा जेसीजका पूर्व अध्यक्ष शिवकुमार कडेल र भिम भट्टराई, जामुनवारी सामुदायिक वन समूहका अध्यक्ष ख्यामराज सिटौला,सुकेडाँगी सामुदायिक वन समूहका अध्यक्ष भक्तवहादुर पौडेल लगायतले मन्तव्य राखेका थिए । 
सुरुङ्गा जेसीजकी मेनुका उप्रेतीले आस्थावाचन र उषा(यदुका) उप्रेतीले जेसीआई मिसन भिजन प्रस्तुत गरेको कार्यक्रममा जेसीजका खेल संयोजक केशव शिवाकोटीले स्वागत मन्तव्य राखेका थिए । कार्यक्रमको संचालन सुरुङ्गा जेसीजका महासचिव प्रविन तिम्सिनाले गरेका थिए ।
