फोटा सौजन्यः शिव कडेल
कनकाई खबर \ बसोबासकालागि घर नहुनेलाई सुरक्षित आवास कार्यक्रम अन्तर्गत कनकाई नगरमा घर निर्माणको कार्यले तिव्रता पाएको छ ।
यसै क्रममा त्रिपक्षीय साझेदारी कार्यक्रम अन्तर्गत कनकाई नगरको वडा नं.३ मा रहेका विपन्न समुदायको पहिचान गरी २० वटा घर बन्ने भएका छन् । वडाको समेत बजेटमा कनकाई नगरपालिका, सहारा नेपाल र ह्याबीट्याट नेपालको आर्थिक साथै प्राविधिक सहयोगमा वडा नं.३ को पिङ डाँडामा घर निर्माण हुन लागेको निर्माण समितिका संयोजक समेत रहेका वडा सदस्य युवराज चम्लगाईँले वताएका छन् । वडाको पहलमा निर्माण हुन लागेको २० वटा घरको एक कार्यक्रमका विच कनकाई नगरपालिकाका प्रमुख राजेन्द्रकुमार पोखरेल र वडाअध्यक्ष रुद्रप्रसाद चिमरीयाले संयुक्त रुपमा शिलान्यास गरेका छन् । घर निर्माणकालागि कनकाई नगर वडा नं.३ ले आ.व.२०७५\०७६ को वजेटवाट प्रति घर रु.७५ हजार उपलव्ध गराउँने वडाअध्यक्ष रुद्रप्रसाद चिमरीयाले वताएका छन् । भुइँ ढलानसहितको टिनको छानो भएको तीनकोठे घर निर्माणमा सम्वन्धित घर धनीको समेत श्रम सहयोग रहने वडाअध्यक्ष चिमरीयाले वताए ।
विपन्न समुदायकालागि निर्माण हुन लागेको घरलाई थप व्यवस्थित बनाउँनकालागि कनकाई नगरपालिकाको तर्फवाट समेत तत्कालकालागि प्रति घर रु.२० हजारका दरले रकम उपलव्ध गराउँने नगरप्रमुख पोखरेलले वताएका छन् । कनकाई नगर क्षेत्रमा लामो समयदेखि बसोबास गर्दै आएपनि आवासको अभाव भएका जोकोही पनि नगरवासीलाई सुरक्षित आवासको व्यवस्था मिलाउँने स्थानीय सरकारको समेत जिम्मेवारी भएको कारण यस अभियानमा कनकाई नगरपालिका सधैं सकारात्मक रहेको नगरप्रमुख पोखरेलले वताएका छन् । आवास बिहिन विपन्न वर्गकालागि कनकाई नगरले मेयर आवास कार्यक्रम अन्तर्गत पनि आवश्यक्ता अनुसार नगरका हरेक वडामा घर निर्माण गर्दै आएको वताइएको छ ।
त्यस्तै सहारा नेपाल र ह्यावीट्याट नेपालले प्रति घर रु.७५ हजार साथै प्राविधिक सहयोग उपलव्ध गराउँने भएको सहारा नेपालका कन्ट्री टिम लिडर टि.पी.शर्मा कडेलले वताएका छन् । संविधानमै सुरक्षित आवास जनताले पाउँनुपर्छ भन्ने उल्लेख भएअनुसार राज्यलाई समेत सहयोग गर्ने उद्येश्यले सहारा नेपालले झापा लगायत प्रदेश नं.१ भरी नै साझेदारीमा सुरक्षित आवास निर्माण कार्यको अभियान संचालन गर्दै आएको कडेलले वताए । आ.व.२०७५\०७६ देखि हालसम्ममा सहारा नेपालको अगुवाईमा ७ सय बढी घरहरु निर्माण भइसकेका छन् भने आ.व.२०७६\०७७ मा ५ सय बढी घरहरु बनाउँने योजना रहेको वताइएको छ । सहारा नेपाल र ह्यावीट्याटले कनकाई नगरको वडा नं.२ मा समेत वडासँगको साझेदारीमा १२ वटा घर निर्माण गरिरहेको वताइएको छ । त्यस्तै कनकाई नगरकै वडा नं.१ मा स्थानीय प्रजापति सामुदायिक वनसँगको साझेदारीमा २२ वटा घरको निर्माण कार्य भइरहेको सहारा नेपालका कन्ट्री टिम लिडर कडेलले जानकारी दिएका छन् ।
वडाअध्यक्ष रुद्रप्रसाद चिमरीयाको सभापतित्व रहेको वडा नं.३ को सुरक्षित आवास निर्माण अन्तर्गतको शिलान्यास कार्यक्रममा स्थानीय राजनीतिक दल साथै जनप्रतिनिधी, विभिन्न संघसंस्थाका प्रमुख तथा प्रतिनिधीहरुको उपस्थिती रहेको थियो ।
