कनकाई खबर \ कनकाई नगर क्षेत्रमा क्रियाशिल युवाहरुको सामाजिक संस्था ज्ञानज्योती युवा क्लवले एक कार्यक्रमका विच जाडोको कपडा वितरण गरेको छ ।
विपन्न समुदायकालागि लक्षित गरेर संकलन गरिएको जाडोको कपडा कनकाई नगरको वडा नं. ५ स्थित बेनुबाजा क्षेत्रका एक सय बढी बिपन्न समुदायलाई वितरण गरिएको ज्ञानज्योती युवा क्लवका अध्यक्ष नारायण भेट्वालले वताएका छन् । जाडोको समयमा बिपन्न समुदायको आवश्यक्तालाई मध्यनजर गर्दै क्लवले सुरुङ्गामा संचालन गरेको ‘कपडा बैंक’ मार्फत जाडोको कपडा वितरण गरेको हो । क्लवले कनकाई नगरको सुरुङ्गा चौकस्थित सार्वजनिक स्थलमा भर्खरै जाडोको समयभरी रहने गरी कपडा बैंक पनि संचालनमा ल्याएको छ ।
चिसो बढेसँगै विभिन्न रोगका कारण ग्रसित बन्दै गएका निम्न स्तरका स्थानीयबासीलाई एक मान्छे एक सरो कपडा भन्ने अभियानका साथ क्लवले कनकाई नगरका विभिन्न टोलमा गएर केही दिनदेखि निरन्तर रुपमा जाडोको कपडा वितरण गरिरहेको वताइएको छ । जाडोको बेला घरमा पनि धेरै समय आगो तापेर दैनिक जीवन बिताउँने गरेका विपन्न समुदायका स्थानीयबासीले निशुल्क रुपमा न्यानो कपडा पाउँदा आँफूमा खुशी छाएको बताएका छन् । 
क्लवका अध्यक्ष नारायण भेट्वालको सभापतित्व एवम् कनकाई नगर वडा नं.५ का वडाअध्यक्ष कृष्णवहादुर राईको प्रमुख आतिथ्य रहेको न्यानो कपडा वितरणको कार्यक्रम बेनुबाजा अंग्रेजी माध्यमिक विद्यालय परिसरमा सम्पन्न भएको हो । क्लवका सचिव पारस खरेलले स्वागत गरेको औपचारिक कार्यक्रममा स्थानीय जनप्रतिनिधी, विभिन्न सामाजिक संघसंस्थाका प्रमुख तथा प्रतिनिधी, विद्यार्थीसहित अभिभावकको उपस्थिती रहेको थियो ।
क्लवका सल्लाहकार सागर ढुङ्गानाले संचालन गरेको कार्यक्रममा बेनुबाजा अंग्रेजी माविका प्रिन्सिपल विनोद सुव्वा, विद्यालयका अध्यक्ष प्रेमप्रसाद विमली, नेपालकालागि नेपाली अभियानका झापा संयोजक महेन्द्र प्रसाई लगायतले मन्तव्य राखेका थिए ।
