कनकाई खबर डेक्स \ सुरुङ्गा खानेपानी तथा सरसफाइ उपभोक्ता संस्थाको यहि जेठ १६ गते हुने कार्यसमितिको निर्वाचनमा सुरुङ्गा खानेपानीका संस्थापक अध्यक्ष प्रेमप्रसाद दहाल र सुरुङ्गा गाविसका पूर्व अध्यक्ष भीमप्रसाद अधिकारी विच प्रतिस्पर्धा हुने भएको छ ।
नेकपा र राप्रपाको एक समूहको सहकार्यमा संयुक्त प्यानल निर्माण गरी अध्यक्षको पदमा उम्मेद्वारी दिएका दहाल नेकपाका नेता हुन् । स्थानीय निर्वाचनमा कनकाई नगरको नगरप्रमुखको प्रत्यासी बनेका दहालले संसदीय निर्वाचनमा समेत झापा क्षेत्र नं.४ वाट आफ्नो उम्मेद्वारी प्रस्तुत गरेका थिए । सुरुङ्गा खानेपानीको स्थापनाकाल २०५३ साल देखी हालसम्म अध्यक्षको जिम्मेवारी सफलतापूर्वक बहन गर्दै आएका सामाजिक व्यक्तित्व दहालले नेपाल यातायात व्यवसायी महासंघ, मेची यातायात संघ, मेची पेट्रोलीयम डिलर्स लगायतका संस्थाहरुको नेतृत्व गरिसकेका छन् ।
स्थानीय विभिन्न सामाजिक तथा धार्मिक संघसंस्थाहरुमा समेत सक्रिय भूमिका निर्वाह गर्दै आएका दहालको नेतृत्वमा रहेको संयुक्त प्यानलमा उपाध्यक्ष पदकालागि यामनाथ सेड्याईँ, सचिवमा टिकाप्रसाद पाठक, कोषाध्यक्षमा सुरेशकुमार गुरुङ् र दुईजना महिला सदस्यहरुमा कल्पना ढकाल र चित्राकुमारी श्रेष्ठले उम्मेद्वारी दिएका छन् । अन्य सदस्यहरुमा राजेन्द्र उप्रेती, रमेश हुमगार्इँ र भिष्म मैनाली रहेका छन् । संयुक्त लोकतान्त्रीक प्यानलको नेतृत्व गरेका साझा विवेकशिल पार्टीका नेता सामाजिक अभियन्ता भीमप्रसाद अधिकारीसहित नेपाली कांग्रेस, राप्रपा नेपाल र संघीय समाजवादी पार्टीको सहकार्यमा चुनावी मैदानमा जुटेका छन् ।
सुरुङ्गा खानेपानीको अध्यक्ष पदका उम्मेद्वार बनेका अधिकारी २०४३ सालमा गाउँपञ्चायतको निर्वाचनमा तत्कालिन सुरुङ्गा गाउँपञ्चायतको वडा नं.४ वाट जनपक्षीय उम्मेद्वारका रुपमा वडाअध्यक्षमा निर्वाचित भइ सामाजिक क्षेत्रमा क्रियाशिल हुँदै आएका हुन् । त्यसपछि देशमा बहुदल आएपछि २०४९ देखी २०५९ साल सम्म लगातार दुई पटक तत्कालिन सुरुङ्गा गाविसको अध्यक्षको सफल जिम्मेवारी पूरा गरिसकेका अधिकारी जनताका सुख दुःखमा सहभागिता जनाउँदै एक सामाजिक कार्यकर्ताका रुपमा स्थापीत छन् । गत स्थानीय निर्वाचनमा स्वतन्त्र रुपमा कनकाई नगरको प्रमुखको उम्मेद्वार बनेर तेस्रो शक्तिका रुपमा स्थापीत भएका अधिकारी सुरुङ्गा खानेपानीको योजनाकारका रुपमा चिनिन्छन् ।
अधिकारीको नेतृत्व रहेको संयुक्त लोकतान्त्रीक प्यानलका तर्फवाट उपाध्यक्ष पदकालागि युवराज संग्रौला, सचिवमा मीनकुमार प्रधान(गोपाल), कोषाध्यक्षमा रामवहादुर न्यौपाने रहेका छन् भने महिला सदस्यमा धनमाया चिमरीया र अम्बिका चापागाईँ सुवेदी रहेका छन् । त्यस्तै अन्य सदस्यहरुमा बलराम अधिकारी, भरतकुमार श्रेष्ठ र सुर्य गुरुङ्ले उम्मेद्वारी दिएको निर्वाचन समितिका संयोजक टिकाप्रसाद पोखरेलले जनाएका छन् । दुईजना अनिवार्य महिला सहित नौ पदका लागि चार महिलासहित १८ जना उम्मेद्वारहरु निर्वाचनको मैदानमा रहेका छन् । सुरुङ्गा खानेपानीमा कुल २८ सय २५ मतदाता रहेको निर्वाचन समितिका सदस्य दुर्गा प्रसार्इँले वताएका छन् ।
