कनकाई खबर डेक्स / “लैङ्गिक समानताका लागि समान सोच र व्यवहार, समृद्धिको आधार” भन्ने मूल नाराका साथ कनकाईमा १०९ औं अन्तर्राष्ट्रिय महिला दिवस मनाइएको छ । कनकाई नगरपालिकाकी उपप्रमुख मन्जु प्रसाईको सभापतित्व एवम् संघीय सांसद पवित्रा निरौला खरेलको प्रमुख आतिथ्यमा सम्पन्न कार्यक्रममा कनकाई ३ स्थित त्रिवेणी टोलमा निर्माण भएको योगमाया न्यौपानेको शालीक अनावरण गरिएको छ ।
प्रमुख अतिथी खरेलले अग्रणी महिला व्यक्तित्व योगमायाको शालिक अनावरण गर्दै नेपालमा संस्थागत रुपमा महिला आन्दोलनको सुरुवात गर्ने भोजपुर निवासी सामाजिक अभियन्ता योगमायाले समाज रुपान्तरणका लागि खेलेको भुमिका महत्वपूर्ण रहेको भन्दै उनको व्यक्तित्वका वारेमा चर्चा गरीएको थियो । नगरका विभिन्न संघसंस्थाहरुका तर्फवाट आआफ्नो व्यानर लिएर सहभागी भएका महिलाहरुले विभिन्न नारा लगाउँदै योगमाया पार्क सम्म परिक्रमा गरेका थिए ।
कार्यक्रममा कनकाई नगरको विकास निर्माण लगायत विभिन्न क्षेत्रमा पुर्याएको योगदान साथै संविधान लेखनमा महत्वपूर्ण भूमिका खेलेको भन्दै झापाको साविक क्षेत्र नं.४ का चारजना माननीय सभासदहरुलाई विशेष सम्मान गरिएको वताइएको छ । यसरी सम्मानित हुने सभासदहरुमा अम्विका राजवंशी, सरीता प्रसाई, धर्मशिला चापागाईँ र प्रेमवहादुर गिरी रहेका छन् ।
कनकाई नगरपालिकाका प्रमुख राजेन्द्रकुमार पोखरेलको स्वागत तथा कार्यपालिका सदस्य सावित्रा वर्देवा र सुनिता खरेलले संचालन गरेको कार्यक्रममा सहभागी महिलाहरुवाट कविता, गीत, गजल साथै नाटक प्रस्तुत गरीएको थियो । कार्यक्रममा प्रदेश सभा सदस्य हिराकुमार थापा, सम्मानित व्यक्तित्व प्रेमवहादुर गिरी, जेष्ठ नागरिक संघ कनकाईका अध्यक्ष पुण्यप्रसाद वारकोटी, नेपाली कांग्रेस कनकाई नगर सभापति नेत्रप्रसाद चिमरीया, कनकाई नगर महिला संजालकी अध्यक्ष सीता वस्नेत लगायतले शुभकामना मन्तव्य राखेका थिए ।
