कनकाई /कनकाई नगर वडा नं. ६ ले वैंक परिसरमै एक विशेष कार्यक्रमको आयोजना गरी छोरी पढाऊ, बढाऊ–कार्यक्रमको शुभारम्भ गरेको छ ।
समाजमा छोराछोरीलाई पढाउँने विषयमा अभिभावकहरुवाट अझै पनि विभेदकारी व्यवहार भइरहेको भन्दै छोरीलाई हौसलास्वरुप कनकाई नगरको वडा नं. ६ का तर्फवाट छोरी पढाऊ, बढाऊ – कार्यक्रम लागु गरिएको वडा नं. ६ का वडा अध्यक्ष लक्ष्मीप्रसाद ओलीले वताएका छन् । वडामा पहिलो छोरी जन्मेका पाँचजना अभिभावकलाई सनराइज वैंक शाखा सुरुङ्गा परिसरमा एक कार्यक्रमका विच कनकाई नगरपालिकाका प्रमुख प्रशासकीय अधिकृत गणेशप्रसाद वरालको प्रमुख आतिथ्यमा जनही रु.१० हजारको चेक हस्तान्तरण गरीएको हो ।
सम्वन्धित अभिभावकवाट दुई हजार थप गरेर तत्कालका लागि जनही १२ हजारका दरले वैंक खातामा जम्मा भएको वताइएको छ । यस कार्यका लागी वडा अध्यक्ष लक्ष्मीप्रसाद ओलीका तर्फवाट रु.१० हजार, परिषद सदस्यहरु तराप्रसाद फूयाल, अर्जुन राजवंशी, सारदा घिमिरे र गोमा दर्जीवाट दुई/दुई हजारका दरले ८ हजार र वडाको वजेटवाट ५० हजार गरेर वजेट व्यवस्थापन भएको वडा अध्यक्ष ओलीले वताएका छन् ।
भर्खरै जन्म भएकी आफ्नी छोरीका नाममा बैंकमा १५ वर्षे मुद्धती खाता खोलेर १२ हजार रुपैंयाँ जम्मा भएकोमा खुशी व्यक्त गर्दै अभिभावकका तर्फवाट स्थानीय लिलावहादुर कटुवालले यस किसिमको कार्यलाई निरन्तरता दिनु पर्नेमा जोड दिएका छन् ।
वडाअध्यक्ष ओलीको सभापतित्वमा सम्पन्न भएको कार्यक्रममा सनराइज वैंक शाखा सुरुङ्गाका प्रमुख सुदेश मल्ल, समाजसेवी दिर्घवहादुर थापा लगायतले मन्तव्य राखेको कार्यक्रमको संचालन परिषद सदस्य ताराप्रसाद फूयालले गरेका थिए ।
