चम्पापुर \ श्री चम्पापुर माध्यमिक विद्यालयले विविध साँस्कृतिक कार्यक्रमका साथ ५५ औं वार्षिकउत्सव तथा अभिभावक दिवस सम्पन्न गरेको छ ।
वार्षिक उत्सवको अवसरमा आयोजीत विशेष कार्यक्रममा स्व. दिपेन्द्र शिवाकोटीको स्मृतिमा विद्यालयमा स्थापना गरिएको अक्षयकोषवाट स्व. दिपेन्द्रलाई अध्यापन गराउँने भृकुटी माविका शिक्षक कमलचन्द्र डाँगीलाई सम्मान पत्रका साथ दोसल्ला ओढाएर सम्मान गरिएको छ । अक्षयकोषका दाता स्व. शिवाकोटीका वुवाआमा हरीप्रसाद र गोमा शिवाकोटी दम्पतीले अक्षयकोषवाट विद्यालयमा अध्ययनरत गरिव तथा जेहेन्दार साथै उत्कृष्ट केही विद्यार्थीहरुलाई नगदसहितको सम्मान गरेका छन् ।
यसै क्रममा चम्पापुर माविमा कक्षा ६,७, ८, ९ र १० मा अध्ययनरत प्रत्येक कक्षाका प्रथम विद्यार्थीलाई जनही १ हजार ५ सयका दरले नगद सहितको पुरस्कार प्रदान गरीएको छ । त्यस्तै गतवर्षको एसईई परीक्षामा उत्कृष्ट भएका नगरभित्रका विद्यार्थीहरुलाई जनही २ हजार ५ सय पाँचका दरले पुरस्कृत गरीएको छ । त्यस्तै सडक दुर्घटनामा परेर निधन भएका स्व.शिवाकोटी तत्कालिन समयमा विविएस दोस्रो वर्षमा अध्ययनरत विद्यार्थी भएका कारण सोही क्षणको स्मरण गर्दै छैटौं स्मृति दिवसको समेत अवसरमा आयोजीत कार्यक्रममा हाल कनकाई वहुमुखी क्याम्पसमा विविएस दोस्रो वर्षमा अध्ययनरत एकजना विद्यार्थीलाई नगद ४ हजार ५ सय सहित पुरस्कृत गरिएको छ ।
कार्यक्रममा विभिन्न दाताहरुले स्थापना गरेको अक्षयकोषवाट विद्यार्थीहरुलाई स्कुल व्यागसहित नगद पुरस्कार समेत वितरण गरीएको छ । विद्यालयमा स्थापना गरिएका अक्षयकोषहरु मध्ये विद्यालयका पुर्व शिक्षक समेत रहेका कृष्णप्रसाद उप्रेती र तारा उप्रेतीले गोपीलाल र पवित्रा उप्रेती अक्षयकोष, वेनु उप्रेती स्मृति अक्षयकोष र भीमा उप्रेती स्मृति अक्षयकोष गरी तीनवटा अक्षयकोष स्थापना गरेका छन् ।
त्यस्तै अमरराज र सावित्रा खतिवडा स्मृति अक्षयकोष, पं. भीमप्रसाद तिम्सिना स्मृति छात्रवृति, नैनकला स्मृति छात्रवृति, वेदकला छात्रवृति अक्षयकोष, अन्नपूर्ण रेग्मी स्मृति छात्रवृति अक्षयकोष, चन्दादेवी ओली स्मृति अक्षयकोष लगायतका कोषहरुवाट विद्यालयका गरिव, जेहेन्दार तथा उत्कृष्ट विद्यार्थीहरु सम्मानित भएका छन् । पुरस्कृत एवम् सम्मानित सम्पूर्ण व्यक्तित्व एवम् विद्यार्थीहरुलाई कार्यक्रमका प्रमुख अतिथी प्रतिनिधि सभा सदस्य एल.पी.साँवा लिम्वू साथै दाता परिवारका तर्फवाट सम्मान गरिएको थियो ।
विद्यालय व्यवस्थापन समितिका कार्यवाहक अध्यक्ष माधव खतिवडाको अध्यक्षतामा सम्पन्न भएको कार्यक्रममा विद्यालयका प्रधानाध्यापक विष्णु कोइरालाले विद्यालयको भावि कार्ययोजना सहितको प्रगति प्रतिवेदन प्रस्तुत गरेका थिए । शिक्षक रुद्रवहादु थापाले स्वागत गरेको कार्यक्रममा विद्यालयका पूर्व प्रधानाध्यापक, पूर्व व्यवस्थापन समितिका पदाधिकारी, पूर्व शिक्षक ,अभिभावक, पूर्व विद्यार्थी लगायतको उपस्थिती रहेको थियो ।
कार्यक्रमका प्रमुख अतिथि एल.पी.साँवा लिम्वू, विशेष अतिथि कनकाई नगर वडा नं.६ का वडाअध्यक्ष लक्ष्मीप्रसाद ओली, पूर्व अध्यक्ष दिर्घवहादुर थापा, सल्लाहकार संयोजक होमनाथ खतिवडा, अक्षयकोषदाता मुक्तिनाथ तिम्सिना लगायतले मन्तव्य राखेको कार्यक्रमको संचालन शिक्षक तुलाराम वस्नेतले गरेका थिए ।
