कनकाई खबर डेक्स \ नेपाल जेसीजले जनकपुरमा आयोजना गरेको राष्ट्रिय महाअधिवेशनको अवसरमा सुरुङ्गा जेसीजलाई उत्कृष्ट क्षेत्रीय सम्मेलन पुरस्कार प्रदान गरेको छ ।
नेपाल जेसीजको आयोजना र सुरुङ्गा जेसीजको आतिथ्यमा गत भदौ २२ र २३ गते झापाको सुरुङ्गामा दुई दिन सम्म चलेको क्षेत्र ‘क’ सम्मेलनको व्यवस्थापन तथा संचालन वर्ष २०१८ का क्षेत्रीय सम्मेलनहरु मध्येकै उत्कृष्ट भएको भन्दै सुरुङ्गा जेसीजलाई देशकै उत्कृष्ट शाखाका रुपमा सम्मान गरिएको हो ।
समाजमा सक्रिय युवाहरुको नेतृत्वदायी भूमिका निर्वाह गर्दै ‘हो हामी उत्तरदायित्वका साथ समाजमा चम्कन्छौं ’ भन्ने जेसीजको भिजन\मिसन प्राप्ती गर्न यसको मूल धारमा रहेर कार्य सम्पादन गर्दै वर्षभरीका क्षेत्रीय सम्मेलनहरु मध्येको सवै भन्दा उत्कृष्ट कार्यक्रम सम्पन्न गरेको भन्दै क्षेत्रीय सम्मेलन आतिथ्य शाखा सुरुङ्गा जेसीज वर्ष २०१८का अध्यक्ष जेसी भिमप्रसाद भट्टराई र सम्मेलन निर्देशक सुरुङ्गा जेसीजका पूर्व अध्यक्ष जेसी कुमारमणि पोखरेललाई सम्मान सहित उत्कृष्टताको पुरस्कार प्रदान गरीएको हो ।
त्यस्तै राष्ट्रिय महाअधिवेशनकै अवसरमा नेपाल अधिराज्यभरीका सवै जेसीज शाखाहरु मध्येको सवैभन्दा उत्कृष्ट शाखा अध्यक्षका रुपमा समेत सुरुङ्गा जेसीज वर्ष २०१८ का अध्यक्ष जेसी भिमप्रसाद भट्टराईलाई उत्कृष्ट शाखा अध्यक्षको रुपमा सम्मानका साथै पुरस्कृत गरीएको छ । सुरुङ्गा जेसीजले प्राप्त गरेको सम्मान सहितको दुवै पुरस्कार नेपाल जेसीज वर्ष २०१८ का राष्ट्रिय अध्यक्ष सिनेटर श्रीधर बत्स्यालले प्रदान गरेका हुन् ।
