सुुरुङ्गा \ सुरुङ्गा जेसीजको वार्षिक क्यालेन्डर अनुसार शुक्रवार घैलाडुवा स्थित आदर्श विद्या मन्दिर माविमा विविध कार्यक्रमका साथ जारी जेसीज सप्ताहको समापन भएको छ ।
मानव सेवालाई नै जीवनको सर्वोत्तम कार्यका रुपमा आत्मासाथ गर्दै सामाजिक क्षेत्रमा समेत क्रियाशिल युवाहरुको संस्था सुरुङ्गा जेसीजले विद्यालयका विद्यार्थीहरुलाई जाडोको कपडा स्विटर साथै शैक्षिक सामग्री वितरण गरी यस वर्षको जेसीज सप्ताह समापन गरेको हो । नर्सरी देखी कक्षा पाँच सम्म पूर्ण अंग्रेजी माध्यममा पठनपाठन हुँदै आएको यस विद्यालयमा अध्ययनरत नर्सरीदेखी कक्षा दुई सम्मका १५३ जना विद्यार्थीहरुलाई स्विटर वितरण गरिएको हो ।
कार्यक्रमका प्रमुख अतिथी कनकाई नगर वडा नं.९ का वडाअध्यक्ष प्रेमप्रसाद राजवंशीले विद्यार्थीहरुलाई स्विटर वितरण गरेका हुन् । विर्तामोड स्थित स्वस्तीक स्टोरकी प्रोपाइटर उमा चापागाँईँले आफ्ना छोराछोरी अनुप र आस्माको जन्म दिनको अवसर पारेर सुरुङ्गा जेसीजलाई १ सय थान स्विटर उपलव्ध गराएको सुरुङ्गा जेसीजका शाखा सम्पादक राम निरौलाले वताएका छन् ।
जेसीज सप्ताहको अन्तीम कार्यक्रमका रुपमा रहेको मनोरञ्जनात्मक म्युजीकल चेयरमा स्थानीय जेष्ठ माताहरु साथै स्थानीय विद्यालयका शिक्षिका लगायतको सहभागिता रहेको थियो । जस मध्ये हीरा पराजुली घिमिरेले प्रथम स्थान हात पार्न सफल भएकी छन् भने गौरा उप्रेती र गीता पराजुली क्रमशः दोस्रो र तेस्रो भएका छन् । विजेता तीनैजनालाई सम्मानसहित आकर्षक पुरस्कार प्रदान गरीएको म्युजीकल चेयर कार्यक्रम संयोजक सुष्मा न्यौपाने उप्रेतीले वताएकी छन् ।
सुरुङ्गा जेसीका अध्यक्ष भीमप्रसाद भट्टराईको सभापतित्व एवम् कनकाई नगर वडा नं.९ का वडा अध्यक्ष प्रेमप्रसाद राजवंशीको प्रमुख आतिथ्यता रहेको कार्यक्रममा विद्यालयका प्राचार्य धर्मानन्द निरौला, क्रसर तथा खानी उद्योग व्यवसायी महासंघका केन्द्र्रिय सदस्य शेरवहादुर थापा, कनकाई उद्योग वाणिज्य संघका अध्यक्ष एवम् सुरुङ्गा जेसीजका पुर्व अध्यक्ष कुमारमणि पोखरेल, नेपाल रेडक्रस सोसाइटी उपशाखा घैलाडुवाका सभापति केशव वेडारी लगायतले मन्तव्य राखेका थिए । स्विटर वितरण कार्यक्रमका संयोजक सुरुङ्गा जेसीजका कार्यकारिणी उपाध्यक्ष अर्जुन वोहोराले स्वागत गरेको कार्यक्रमको संचालन सचिव त्रिलोचन उप्रेतीले गरेका थिए ।
