झापा \ नेकपा एमालेका अध्यक्ष एवम् पुर्व प्रधानमन्त्री केपी शर्मा ओलीले विहिवार झापाका दुईवटा चुनावी सभालाई सम्बोधन गर्ने भएका छन् ।
उदयपुर र सुनसरीको सभा सकेर बुधबार साँझ दमकमा कार्यकर्ता भेटघाटपछि झापा निर्वाचन क्षेत्र नं.–१ र ५ को वृहत चुनावी सभालाई सम्बोधन गर्न ओली झापा आउने पार्टीका जिल्ला अध्यक्ष दिपक कार्कीले जानकारी दिएका हुन् । मंसिर १ गते मेचीनगर र गौरीगञ्जको चुनावी सभालाई सम्बोधन गर्न आउने निश्चित भएको बताइएकोछ । नेकपा एमालेले बिहीवार मेचीनगर ७ इटाभट्टामा झापा–१ क्षेत्रीय आमसभाको आयोजना गरेको पार्टीका क्षेत्रीय कमिटी संयोजक टिकाराम मग्रातीले जानकारी दिए । यस्तै, गौरीगञ्जमा समेत चुनावी सभा आयोजना गरिएको नेकपा एमाले झापाले जनाएको छ ।
मंग्रातीका अनुसार इटाभट्टाको नगरपालिका जाने बाटो पूर्व खाली चौरमा आमसभा हुनेछ । सभालाई सम्बोधन गर्न एमाले अध्यक्ष ओली विहान १०ः३० बजे आउने भएका छन् । गौरीगञ्जमा १ बजे सम्बोधन गर्ने कार्यक्रम तय भएको छ ।
झापा–१ मा नेकपा एमालेका तर्फबाट प्रतिनिधिसभा सदस्यमा पार्टीका स्थायी कमिटी सदस्य अग्नी खरेल, प्रदेश १ मा पार्टीका केन्द्रीय सदस्य तथा जिल्ला सहइञ्चार्ज रविन कोइराला र प्रदेश २ मा तालमेलका आधारमा राष्ट्रिय प्रजातन्त्र पार्टीका तर्फबाट सबिना बजगाई उम्मेद्वार रहेका छन् ।
प्रतिनिधिसभा सदस्यका उम्मेद्वार खरेलले पार्टीका अध्यक्ष ओलीबाट झापा १ का आम मतदाताहरुकालागि चुनावी सन्दर्भमा महत्वपूर्ण सन्देश लिएर आउने भएकाले सबै आमावुवा, दिदीबहिनी र दाजुभाइलाई आमसभामा सहभागिताका लागि अपिल गरेका छन् । मंसिर ४ को चुनावपछि मुलुकमा नेकपा एमालेको सरकार बन्ने र त्यसको नेतृत्व पार्टीका अध्यक्ष केपी शर्मा ओलीले गर्ने भएकाले झापा १ का मतदाता ओलीको चुनावी सभालाई भब्य र सफल बनाउन आतुर रहेको प्रदेश १ का उम्मेद्वार कोइरालाले बताए ।
नेकपा एमाले झापाले इट्टाभट्टा र गौरीगञ्जको चुनावी सभालाई सभ्य र भव्य रुपमा सफल बनाउने जनाएको छ । पार्टी अध्यक्ष कार्कीले सबै नेता कार्यकर्ता र शुभचिन्तकहरुलाई सहभागी हुन अपील समेत गरेका छन् ।
