सुरुङ्गा / ज्येष्ठ नागरिक संघ कनकाई नगर वडा नं.४ ले मातातीर्थ औंसी एवम् अक्षय तृतीयाको अवसर पारेर समाजका ज्येष्ठ माताहरुलाई सम्मान गरेको छ ।
कनकाई नगर वडा नं.४ स्थित ज्येष्ठ नागरिक आदर्श चौतारीमा मंगलवार सम्पन्न समावेशी सम्मान कार्यक्रममा समाजका विभिन्न जातजातीका १५ जना ज्येष्ठ माताहरुलाई सम्मान गरिएको हो । यसरी सम्मानित हुनेहरुमा टिकादेवी खरेल, दुर्गादेवी तिम्सिना, कृष्णकुमारी कार्की, यमुना दाहाल, कृष्णकुमारी पौडेल, देवीमाया दाहाल, भागमाया ढकाल, कलावती भट्टराई, तीलरुपा न्यौपाने, रनमाया कार्की, रुपमाया मगर, देवकादेवी पोखरेल, मनमाया रिजाल, चन्द्रमाया राई र सुकमाया माझी रहेका छन् ।
माता सम्मानकै अवसर पारेर स्थानीय विष्णुभक्त कार्कीलाई नगद १० हजारसहित दोसल्ला ओढाएर सम्मान गरिएको छ । केही वर्ष अघिदेखी दिवा सेवाका रुपमा संचालनमा आएको ज्येष्ठ नागरिक आदर्श चौतारीको संरक्षण र सरसफाईमा महत्वपूर्ण योगदान पुर्याएको भन्दै ज्येष्ठ नागरिक संघ वडा समितिले कार्कीलाई नगदसहितको सम्मान गरेको वताइएको छ ।
सम्मानित सवैजनालालाई कार्यक्रमका प्रमुख अतिथी प्रदेश सभा सदस्य हिरा थापा, कनकाई नगर वडा नं.४ का वडाअध्यक्ष गोविन्द पौडेल, ज्येष्ठ नागरिक संघ कनकाई नगरका अध्यक्ष पुण्यप्रसाद वाह्रकोटी लगायतले सम्मान गरेका हुन् । ज्येष्ठ नागरिक संघका वडा समिति संयोजक विनोद शर्मा दहालको सभापतित्व एवम् उपाध्यक्ष बलराम सुवेदीको स्वागत मन्तव्य रहेको कार्यक्रममा कनकाई ४ का वडा अध्यक्ष गोविन्द पौडेल, ज्येष्ठ नागरिक संघका नगर अध्यक्ष पुण्यप्रसाद वाह्रकोटी, संघका नगर सचिव शम्भू पोखरेल, पत्रकार राम निरौला लगायतले मन्तव्य राखेका थिए । कार्यक्रमको संचालन संघका वडा सचिव डम्वर फुयालले गरेका थिए ।
