कनकाई \ “जेष्ठ नागरिकको सम्मान राष्ट्रको पहिचान” भन्ने मूल नाराका साथ जेष्ठ नागरिक संघ कनकाई नगर समितिले जेष्ठ नागरिक सचेतना कार्यक्रम सम्पन्न गरेको छ ।
दुर्गापुरस्थित दलित सामुदायिक भवनमा सोमवार भएको सचेतना कार्यक्रममा विभिन्न तीनवटा विषयगत क्षेत्रमा अन्तरक्रिया समेत सम्पन्न भएको थियो । सम्मानसहितको अन्तरक्रिया कार्यक्रममा अग्रज संचारकर्मी चन्द्र भण्डारीले जेष्ठ नागरिकसँग संचारको भूमिकाको विषयमा आफ्नो धारणा राखेका थिए ।
संचार माध्यमले समाजका जेष्ठ नागरिकको संरक्षण र पहिचानका लागि सधैं क्रियाशिल हुनु पर्ने तर्फ जोड दिँदै भण्डारीले समाजमा धर्म, संस्कृति र संस्कारको संरक्षण हुनु नै जेष्ठ नागरिकको सम्मान भएको वताएका छन् । सचेतनामूलक कार्यक्रममा सर्वोच्च अदालतका पूर्व अधिकृत योगेन्द्रप्रसाद आचार्यले मानव अधिकार र जेष्ठ नागरिकका विषयमा आफ्ना धारणा राखेका थिए भने रेडक्रसकर्मी केदार महतले मानव अधिकार र जेष्ठ नागरिकका विषयमा सहभागिहरुलाई सचेत गराएका थिए ।
जेष्ठ नागरिक संघ कनकाई नगर समितिका अध्यक्ष पुण्यप्रसाद वाह्रकोटीको सभापतित्व एवम् कनकाई नगरपालिकाकी उपप्रमुख मन्जु प्रसाईँको प्रमुख आतिथ्यतामा सम्पन्न कार्यक्रममा कनकाई नगर वडा नं.६ का भोलानाथ संग्रौलालाई असल छोराको रुपमा र कनकाई नगर वडा नं.४ की धनमाया पौडेल तिम्सिनालाई असल वुहारीका रुपमा दोसल्ला ओडाएर सम्मान गरिएको छ ।
नगर समितिका उपाध्यक्ष गोपाल चुडालले स्वागत एवम् सदस्य रघुनाथ भट्टराईले स्वस्तीबाचन गरेको कार्यक्रममा जेष्ठ नागरिक संघ जिल्ला अध्यक्ष भवानीप्रसाद दहाल, संघका झापा गाउँपालिका उपाध्यक्ष राजेश थापा, कनकाई ९ का वडाअध्यक्ष प्रेम राजवंशी, भृकुटी माविकी प्राचार्य अन्जना सिटौला लगायतले शुभकामना मन्तव्य राखेको कार्यक्रमको संचालन जेष्ठ नागरिक संघ कनकाईका सचिव शम्भु पोखरेलले गरेका थिए ।
