कनकाई खबर \ नेकपा (एमाले) कनकाईलेको कार्वाही लिष्टमा परेका कनकाई—१ वडा कमिटीका ईञ्चार्ज दधिराम पोखरेलले आँफै पार्टी परित्याग गरेको घोषणा गरेका छन् ।
गत स्थानीय निर्वाचनदेखि नै पोखरेलसहित पार्टीको हित विपरीत गतिविधि गर्ने अन्य केही पार्टीका जिम्मेवार कार्यकर्ताहरु पार्टीको निगरानीमा रहेको नेकपा एमाले कनकाईले जनाउँदै आएको थियो । सोही क्रममा नैतिकताका आधारमा आफ्नो कमजोरीलाई ढाकछोप गर्न त्यस्ता व्यक्तिहरु पर्टीबाट बाहिरिने क्रम भइरहेको सो पार्टीले जनाएको छ ।
पार्टीले औपचारिक रुपमा कार्वाही गर्नु पूर्व नै पत्रकार सम्मेलन गरी एमाले कनकाई १ को वडा कमिटी ईञ्चार्ज साथै नगर कमिटीको सचिवालय सदस्य समेत रहेका पोखरेलले आगामी दिनमा कुनै पनि पार्टीमा नरहने गरी एमाले पार्टी परित्याग गरेको जनाएका छन् । स्वतन्त्र बस्ने घोषणा गरेका पोखरेललाई लौरो अभियानका स्वतन्त्र समूहले स्वागत गरेका छन् । हाम्रो नेपाली पार्टीका केन्द्रिय प्रवक्ता रोहन कार्की , लौरो चुनाव चिन्ह भएका स्वतन्त्र समूहका झापा ४ का प्रतिनिधि सभा सदस्यका उम्मेद्वार युक्तप्रसाद भेट्वाल, अभियन्ता एवं कनकाई नगर संयोजक शेरवहादुर थापा लगायतले लौरो उपहार दिएर आफ्नो समूहमा स्वागत गरेका थिए ।
चार दशकदेखि एमालेको पार्टी राजनीतिमा सक्रिय रहेका पोखरेलले पार्टीमा विचार, नीति, विधि भन्दा गुटको राजनीति हावी भएकाले पार्टी छोडेको बताए । २०३८ सालमा विद्यार्थी जीवनकालदेखि राजनीतिमा सक्रिय उनले जेलनेल भोगेको बताए । पद नमागी पार्टीको हरेक गतिविधिमा सक्रिय भएर लागेको बताउँदै पोखरेलले पार्टीमा असल कार्यकर्ताको मूल्यांकन नहुने, आर्थिक अवस्था कमजोर भएका कार्यकताई नगन्ने, नेतृत्व गर्न सक्नेलाई लखेट्ने र नवप्रवेशीलाई मात्र मौका दिने भएकाले पार्टीमा बस्न र काम गर्न नसक्ने अवस्था भएकाले पार्टी त्यागेको जानकारी दिए ।
कालोलाई कालो र सेतोलाई सेतो भन्न सक्ने बन्नका लागि पार्टी त्यागेको बताउँने पोखरेल गत स्थानीय निर्वाचनमा एमालेका तर्फबाट वडा नं.१ को वडाअध्यक्ष पदका आकांक्षी थिए । सो पदकालागि पार्टीले सिफारीस नगरेपछि एमाले पार्टीसँग टाढिँदै आएका नगर सचिवालय सदस्य समेत रहेका वडा ईञ्चार्ज पोखरेल पार्टीको सम्पर्क बाहिर रहँदै आएका थिए । दुवै तहको कुनै पनि बैठकमा पार्टीले पोखरेललाई जानकारी नै दिन छाडेपछि बाध्य भएर पार्टी त्याग्नु परेको बताइएको छ ।
